UDAH pemujur nengah lagu Tubai Pengerindu diatu Isa Lee datai baru enggau lagu berentak ‘Rock and Roll’ ti digelar iya enggau nama HELLO.

Isa Lee endang udah dikelala siku ari artis kitai Iban ti udah tampak nama ba pemerindang dunya musik Dayak.

Tau mega disebut, lagu Tubai Pengerindu ke sebedau tu mayuh nyungkak nama iya sebela tikas enggau bala artis bukai.

Kebuah pia, baik nembiak tauka besai tuai bela rindu ningga lagu nya kelimpah suah ditebah nengah radio menua tu.

Ke sekali tu, Isa ti mega siku pengajar nguji ngubah tiun lagu iya ari rentak Balada ngagai Rock and Roll nengah lagu HELLO.

Berandau enggau pengarang empai lama, iya ke dikelala siku artis ti kemerah maya begulai enggau sapa-sapa enda sanggu bekunsika sekeda ari tibak penatai ‘HELLO’ ke disadang nerima sambut ke manah ari bala peminat lagu Iban.

PEMADAS ORANG INDU

Kena ngepunka randau, dulu agi Isa madahka buah penemu nengkebang lagu tu ari pemuas ti beratika pemadas ‘utai’ digaga Petara iya nya orang indu.

“HELLO datai ari runding aku kenyau ke suah beratika orang indu.

“Kitai nemu magang, bisi mega bela alit ati maya beratika pemadas utai digaga Petara iya nya orang indu.

“Nyau ke pemuas, aku teulihka runding ngerintai leka jaku kena nela pekara tu sebedau digagaka leka lagu ‘HELLO’,” pia ku iya nerang.

RETI DALAM LAGU

Ngerintai nyemetak agi, Isa Lee madah, dalam leka lagu HELLO iya bekenangka chara sida ke indu enggau lelaki ngepunka randau sebedau bekalala enggau pangan diri.

“Siti jaku ke dulu agi suah disebut kitai maya nyapa sida ke indu iya nya ‘Hello’.

“Kitai nyapa pangan diri enggau chara ke betul, chara basa sebedau neleba tauka bekelala enggau sida semak agi.

“Nya alai, lagu ke sekali tu digaga aku nitihka nama ke amat nyadi kelimpah nusi pemadas ‘utai’ digaga Petara tu,” ku iya.

Berita penuh dalam Suara Sarawak pagila