LINGGA: Sitak Kunsil Nengeri (Dun) Lingga patut lebih nerima perati, begunaka pengari ti regas agi ngabas rayat, kurangka pengawa politik tang patut lebih chakah ngemujurka pengawa pemansang, ku chalun PSB Lingga Datuk Wan Abdillah Edruce Wan Abdul Rahman.

Wan madah, sekumbang semak enam taun udah bejalaika pengawa dalam Gerempung Ukai Perintah (NGO) di sitak tu, iya meda pemansang pemun chukup lubah diatur dibanding enggau sitak bukai.

“Arapka peranak sitak Lingga meri peluang ngagai aku ngubah pengidup sida. Berunding panjai ngaga ubah ke pemaik anak uchu kita dudi hari.

“Aku meransang rayat di Dun Lingga angkat begulai enggau aku ngemujurka agenda pemansang di sitak tu. PSB endang sebuah parti ke beamai-amai negika pekara adil ungkup semua rayat enggau nadai bechiping bansa enggau pengarap,” ku iya lebuh dirandau Suara Sarawak, kemari.

Nangkan nya, Wan andal enggai peneleba Presiden, PSB deka bejalaika bemacham inisiatif dikena ngangkatka kualiti pengidup rayat awakka tikas sida di menua pesisir enda bangat tinggal.

Ungkup penemu, reti lambang matahari ba parti PSB iya nya panchar matahari ke terang mandangka Sarawak deka bisi pengidup ti manah sereta lantang jemah ila.

Udah nya, kar Sarawak mandangka PSB sebengkah parti ti bepelasarka Sarawak lalu ngemeratka pengawa negika hak-hak Sarawak.

Lalu chura mirah, chelum enggau kuning ngelai bansa ke pemadu mayuh di Sarawak iya nya Melayu/Melanau, Dayak enggau China ti udah idup begulai lantang baka diri sebilik.