KUCHING: Kaban Parlimen Bandar Kuching, Dr Kelvin Yii ngenukuka diri positif kena penyakit COVID-19 nengah Facebook iya, ditu kemari.

Diatu, Kelvin udah diubat ngagai Sepital Besai Sarawak (SGH) ngambi dikurung enggau dipatau nitihka standard ditetapka Opis Menteri Pengerai Malaysia (KKM).

Ba facebook nya, Kelvin madahka Opis Pengerai kemari udah ngeluarka pemutus peresa COVID-19 iya begulai enggau Kaban Parlimen Stampin, Chong Chieng Jen lalu pemutus peresa Chieng Jen nya negatif.

“Aku agi baka selama enggau nadai nunjukka simptom nya. Peresa ba wad mega nunjukka aku nadai tabin enggau nadai simptom nya.

“Aku bisi ngaul enggau Kaban Parlimen Sarikei Wong Ling Biu kena 2 March tu tadi.

“Taja pia, aku nadai asai dirampit igi penyakit nya kenyau 14 hari ke udah,” terang iya.

Terang Kelvin, Opis Pengerai mega ngelala kaul enggau simptom dirampit bukai kelimpah kaul iya enggau Ling Biu.

Iya mega madah, Opis Pengerai udah meri jamin ngasuh mensia mayubbejimat nyengkaum ngelala enggau telefon ngagai sida ke kaul enggau iya ungkup pansik silik tauka beperesa.

“Kami mega deka mensia mayuh ke kala semak enggau aku anang irau tang sida patut bejimat enggau nyaga pengerai diri ngambi nyeliahka diri ari dirampit igi penyakit nya.

“Sida mega madahka aku nadai simptom igi penyakit tu pengelama dua minggu ke udah. Nya kebuah, peratus aku dirampit nya agi baru,” ku iya.

Kelvin ngelalau mensia mayuh nitihka atur ke udah ditetapka baka ngenyauhka takah enggau pangan diri, ngurung diri ba rumah, anang mindah kelimpah ari bisi pengawa bukai enggau nyaga pemeresi diri.
“Kami minta sida beperesa ngagai sepital enti sema bisi kaul enggau aku tauka enda, bisi simptom penyakit nya,” terang iya.