KUCHING: Sapit Menteri Pengawa Bekebun enggau Komoditi Willie Mongin ngelalau rayat Malaysia kelebih agi ba sitak Puncak Borneo meri kerejasama ngagai pengawa nagang pengerekai igi penyakit Covid-19.

Tu kelebih agi pengudah siku rayat Sarawak keterubah ti ditemu lesi bebadi ketegal igi penyakit tu, kemari.

Berindik ari pekara nya, iya ti mega nyadi Kaban Parlimen Puncak Borneo minta genap iku rayat ba menua tu ngemeratka atur bejaga sereta seruran ngintu pemeresi diri.

“Pengawa ngenyauhka diri ari orang dipelaba kena rampit igi penyakit tu siti pekara ti pemadu dikemerat genap iku kitai.

“Nya alai mensia mayuh dilalau nitihka atur terit ke udah ditetapka Perintah Besai, diau ba rumah sereta enda bejegau ke bukai enti nadai kebuah,” ku iya madah ba siti penerang, kemari.