KUCHING: Semua gempuru enggau misa Gerempung Injil Kristian Sarawak (SECA) deka dilanjar pengelama 14 hari nyentuk 31 March.

Chairman SECA, Pastor Mathew Ling madah, tu siti chara nyukung penuh pengawa nagang pengerekai igi penyakit Covid-19 ba menua tu.

“Semua operasyen tadika, taska, sekula enggau kelas belajar ba gerija deka dilanjar lalu sebarang pejalai jauh tauka semak naka diatu patut diketu dulu.

“Semua pengawa sembiang ba gerija deka dipejalai nengah teknologi ke bisi lalu kami minta genap iku raban gerija diau ba rumah sereta gawa ari rumah,” ku iya madah ba siti penerang, tadi.

Nangkan nya ku Mathew, genap raban gerija patut terit ba pengawa nyaga tikas pengerai enggau pemeresi diri.

“Jaga takah kitai enggau pangan diri laban tu siti ari chara igi penyakit tu ulih berampit,” lalau iya.

Pastor Mathew mega mai raban Kristian sama bela besampi ngambika Perintah Besai ulih ngatur penusah tu enggau manah.