SONG: Adap menua Batang Katibas enggau Ngemah, bisi siti bukit beberita endar dikumbai Bukit Sepali.

Nitihka jerita tuai, bukit ke ngembuan peninggi 2,470 kaki tu mih nandaka menua Katibas besambung enggau Ngemah.

Bukit Sepali, enti kili rembus agai Sungai Nging ba Batang Katibas lalu ari sepiak pan ngili Sungai Lakah ba Ngemah.

Kelia, tu mih bukit ke endang beberita diuan jelu Remaung ke tau negung sereta bisi nyimpan buluh perindu ke penuh rangkah tulang jelu enggau mensia.

Kebuah pia laban bala jelu tauka mensia ke mansa endur nya deka berasai seilu-ilu ninggalka buluh perindu tauka disebut pengerindu, ngujungka iya enda ulih mindah ke bukai lalu parai dia.

MANAH DITIMPAI… Jalai nuju Bukit Sepali agi ngerenchah jalai batang.

Bukit tu di baruh Pelilih Kanowit ti tebal agi diuan raban bansa Dayak sereta entara pelilih menua diangkunka sida Rajah Brooke sebilik nyentuk taun 1930-an.

Taja Perang Dunya Kedua udah badu, tang menua agi sigau ketegal raban penyelawai agi reregap ngachau enggau ngeruga pengelikun rayat dataika perintah maya nya numbuhka skim pengentap baru pendiau.

Berindik ari nya mega, Sitak Pengelikun Kandang Menua Rajang (Rascom) kena 25 March 1972 ti mungkur kandang menua Lembang Rajang ti suah dikachau komunis.

Sitak operasyen Rascom mungkur serap Bagi Menua Sibu, Sarikei enggau Kapit ke alai ditu mih ke bendar tugung semua operasyen munaska komunis dipejalaika raban nyaga pengelikun.

Mulaika pengingat kitai, Bukit Sepali tu mega beberita endar alai endur bala Komunis berpalan, nginau enggau nimpai munsuh.

Nya alai, nyentuk seharitu enti sema bisi rembus ba bukit tu, kitai bisi tetemuka keresa ke dikembuan bala soldadu penyelawai baka duit siling tauka utai bukai.

Bukit Sepali mega agi tampak rita nyentuk seharitu laban agi ngembuan rampa menua ke chukup manah, ayung enggau chukup chelap alai diau bemalam enti lebuh nurun begiga tauka ngasu.

Nyadi siti ari kampung tuai ba Pulau Borneo, menua tu mega chukup mayuh jelu engkuli sereta bansa jelu ke jarang ditemu ba kampung bukai nyengkaum ikan sungai baka empurau, tengadak, semah enggau ke bukai.

Berindik ari nya, pengawa ngetanka menua Bukit Sepali ari ti deka direnchah kompeni ngereja batang patut disukung nentuka pesaka asal menua kitai enda lus ngapa.

Nya alai, pengawa ngambi kayu enggau ngerusak kampung nyengkaum utai tumbuh enggau utai idup tu dibantah sida Juil serumah sereta sekeda rayat ari rumah panjai bukai ke beempu menua ai Sepali.

Baka udah dikenang kitai dulu tadi, menua Bukit Sepali agi mengkang kampung bungas. Agi tubah jelu, burung, kayu enggau pengeraja asal ke bukai bisi dia kelimpah badas endar ditimpai, ngasuh ati lantang.

Ambika chunto, bansa burung Tajai enggau Kenyalang, jelu empeliau kelimpah jelu engkuli ke udah disebut, endang chukup mayuh nguan kampung.