KUCHING: Siti Palan Penyangkai (OSEIC) enggau pemesai 30,000 kaki persegi ungkup anak mit nyelai pendiau (OKU) deka ditumbuhka di Metrocity Matang, ditu.

Menteri Pengintu Pengelantang Pendiau, Komuniti, Orang Indu enggau Pemansang Anak Mit (KWKPK) Datuk Seri Fatimah Abdullah madahka palan nya deka nyendiaka servis beperesa tumu, intervensyen enggau rehabilitasi ngagai bala anak mit berumur enam taun ke baruh ti lubah mansang tauka ngembuan penanggul pemansang ari anak mit bukai.

“Nengah palan nya, bala anak mit ke lubah mansang ulih diperesa, lalu piak OSEIC ulih meresa bansa penyelai dikembuan sida.

“Udah nya sida lalu deka bejalaika proses intervensyen, rehabilitasi enggau pelajar tumu anak mit ulih berengkah dipejalai,” ku iya.

Fatimah madah munyi nya ba aum pemberita pengudah ngemataka pengawa nyain Sempekat Pemereti Ati (MoA) entara KWKPK enggau Gerempung Apai Indai Anak Mit Nyelai Pendiau Sarawak (Pibakat) sereta Sempekat Nyuwa (TA) begulai enggau Chong Kia Hoi Realty Sdn Bhd. ba sebuah hotel tebilang ditu, kemari.

Nangkan nya ku iya, enti bala anak mit ke nyelai pendiau tu udah diperesa sereta bejalaika proses nya tadi, sida ulih disengkaum ba sekula bisa begulai enggau anak mit bukai.

“Enti penyelai pendiau sida enda balat sereta ulah sida agi ulih diajar, kami deka nyukung pengawa apai indai sida nganjung anak ke nyelai pendiau ngagai sekula biasa.

“Tu siti chara kitai nyingkang ke mua, sida patut begulai enggau nembiak biasa laban tu mega chara pelajar inklusif lalu sida deka jampat belajar begulai enggau orang bukai,” ku iya.

Ku Fatimah, pekara tu mega meri penguntung ngagai dua piak baik nya anak mit ke nyelai pendiau tauka anak mit bukai.

Ba lansa ke sama, iya madahka palan tu ulih mantu bala anak mit ke nyelai pendiau bedisiplin sereta belajar ngatika diri kelebih agi ba pengawa ngidupka diri pengudah apai indai nadai agi begulai enggau sida.

“Nya alai kami deka seruran matau palan tu kelebih agi ba pengawa dipejalaika sida ngambika kitai ulih jyapai pengawa ti udah diperambuka ngelama tu,” ku iya.

Rambau pengawa nya, Petronas ti diarika Menijar Besai Petronas Sarawak Zulaihi Mohd Mentali nyuaka chek RM4 juta ngagai Perintah Sarawak nengah KWKPK dikena numbuhka OSEIC.

Bela bisi datai ba pengawa nya dua Menteri Muda KWKPK Datuk Francis Harden Hollis enggau Rosey Yunus.