SARIKEI: Atlit nikau tukul besi menua, Jackie Wong madahka diri meruan sereta gerai naka diatu ba penerang Facebook iya malam kemari.

Jackie diatu benung dikurung ba Sepital Sibu pengudah dituku positif Covid-19 kena 16 March tu tadi.

Kenu ku atlit ari Sarikei nya, iya benung diperubat lalu tikas pengerai mega dipatau rat piak sepital.

“Naka diatu, aku nadai apa nama, agi regas sereta gerai baka selama.

“Nuju bala bakih bukai, aku benung dikurung ba Sepital Sibu ngambika dipatau enggau diperubat,” ku iya.

Ba penerang nya mega, Jackie bisi madahka gaya pengerai apai iya, Kaban Parlimen Sarikei, Wong Ling Biu Andrew ke mega dikurung dia ketegal dirampit igi penyakit sama.

Jackie madah, apai iya majak belinsur manah enti dibanding hari sebedau tu.

“Aku mega deka ngelalau semua kitai anang nabur tauka bekunsi berita bula tauka apin ditukuka Opis Menteri Pengerai Malaysia (KKM).

“Pemanah enggau pengiruh semua kita deka semampai dikenang. Sampika pengerai kami duai meapai enggau kami sebilik,” ku iya.