KUCHING: Orang indu ngembuan tanggungpengawa besai nagang pengerekai igi penyakit Covid-19 ba rumah kelebih agi nyaga pemeresi enggau pengerai ruang bilik sida.

Menteri Pengintu Pengelantang Pendiau, Komuniti, Orang Indu enggau Pemansang Anak Mit (KWKPK) Datuk Seri Fatimah Abdullah madahka bala indu ba genap ruang bilik patut nyaga pemeresi ruang bilik sida ngambika ulih nagang igi penyakit nya.

“Pemeresi ruang bilik tu berengkah ari pemeresi diri empu, laki iya, anak sereta orang bukai ke diau enggau sida ba rumah nya.

“Lebuh kemisi sekula dua minggu tu mih maya orang indu patut ngena kemisi nya enggau pekara ti beguna,” ku iya.
Fatimah madah munyi nya lebuh dirandau pemberita pengudah ngemataka pengawa nyain Sempekat Pemereti Ati (MoA) entara KWKPK enggau Gerempung Apai Indai Anak Mit Nyelai Pendiau Sarawak (Pibakat) sereta Sempekat Nyuwa (TA) begulai enggau Chong Kia Hoi Realty Sdn Bhd. ba sebuah hotel tebilang ditu, kemari.

Nangkan nya ku iya, pemeresi rumah mega patut dikemerat laban nya siti ari chara igi penyakit nya ulih ngerampit.
“Pemeresi jamban, dapur, ruai, bilik tinduk enggau luar rumah patut diberesi lalu tu mih maya kitai patut bebendar agi nyaga pemeresi.

“Kelimpah ari nya, ba pengawa nyendiaka pemakai meseti beresi sereta bela, ngembuan nutrisyen ke beguna ungkup tubuh anak sereta orang ke diau enggau kitai ba rumah nya,” ku iya.

Ba lansa ke sama, Fatimah mega ngemeratka pengawa nyaga pemeresi, pengelikun enggau pengerai diri ba sida ke diau di menua pesisir.

“Bala indai patut ngemataka bala anak sida ngambika sida enda bemain ba endur ti kamah lalu enda begempuru ba alai ke mayuh orang.

“Kebuah pia laban Atur Bejaga udah dibantaika ke alai nadai pengawa begempuru lebih ari 50 iku patut digaga,” ku iya seraya minta apai indai neritka agi pengawa ngemata ulah bala anak bemain.

Ku Fatimah, tu endang maya kitai nempuh pemar nagang pengerekai igi penyakit Covid-19, tang indu Sarawak ti ngembuan mayuh pengelandik ulih ngereja pengawa nya ngatur pemeresi, pengerai enggau pengelikun ruang bilik sida.

Berebak enggau nya, iya ngelalau mensia mayuh enda ibuh bebelika barang ngenyit laban atur bejaga agi ngemendarka rayat menua tu bebelika barang ke diguna ninting hari.

Fatimah mega minta orang indu seruran ngemeratka pengawa anang nabur berita bula sereta nyadi pemberita enda bebayar.