KUCHING: Pengerekai igi penyakit Covid-19 ti bepun ari menua Wuhan, China ukai semina mimpi rawan ngagai peranak dia tang diatu selampur dunya nerima nasip ke sama.

Suah kitai meda sebelah media rama tauka berita bala pemesai pengerai baik nya lutur, misi, tauka pemesai bekaul enggau opis pengerai kiruh ngintu sida ke dirampit igi penyakit tu ba sepital.

Kitai ulih meda pengiruh bala pemesai opis pengerai enggau sepital ngintu enggau ngubat sida ke sakit kelimpah seruran ngelalau mensia mayuh bejaga.

Taja pia, kala tauka enda kitai berundingka jasa orang bukai ke sama kiruh gawa mutarka penusah pengerekai igi penyakit Covid-19 tu?

Lebuh menua dituntung penusah besai baka diatu, bisi 1,700 iku bela kiruh mutarka penusah tu ari One Medicare Sdn Bhd ba 23 buah sepital ba selampur Sarawak.

Sida tu nyengkaum piak polis, pemberita, sereta sida ke disengkaum ba pengawa meri servis beguna ngagai menua udah bebendar kiruh nyaga pengelikun menua.

Chukup sinu lebuh sekeda ari kitai rindu naburka berita bula sebelah media rama sentang utai ke nyadi taja semua kitai sedar, penerang betul ari Opis Menteri Pengerai Malaysia (KKM) ke diguna.

Ulah nabur berita bula patut diketuka laban kitai patut betatika bala ke gawa ba rintai mua kelebih agi sida ke kiruh mutarka penusah jam diatu.