PENYAKIT Covid-19 ti majak ngerekai ba sebarang alai enggau mayuh menua di dunya tu ninting hari chukup meri pengirau ngagai genap iku kitai.

Taja pia, semua kitai dipinta nitihka sekeda atur dikena nyeliah diri ari kena rampit penyakit tu.

Entara atur besai ke udah digerah perintah iya nya Atur Nagang Pejalai diterit berengkah 18 March tu tadi lalu patut dititih pengelama dua minggu nyentuk 31 March tu ila.

Dalam kandang dua minggu tu, mensia mayuh dipinta natak pejalai diri lalu anang bejegau pansut ari rumah ngapa enti nadai kebuah.

Kitai kebendar agi ulih bejalai bebelika barang ngagai supermakit nyema udah abis bekal pemakai di rumah tang udah tembu bebelika barang kitai meseti mupuk mulaika diri.

Nyema kena ditangkap ketegal ngelanggar atur ke udah ditetap dia kita ulih kena tinggang ukum bepelasarka ‘Akta Pencegahan dan Pengawalan Penyakit Berjangkit 1988’ enggau ‘Akta Polis 1967’.

Nya alai, mensia mayuh patut bejejaga sebedau kena tangkap lalu diukum enda ngelui RM1,000 sereta dijil enda lebih ari enam bulan.

Berebak enggau nya, berengkah ari ensana mega mensia mayuh ke diau ba kandang mengeri dilalau ngambika enda ibuh begaut pulai ke rumah panjai jam bisi penyakit baka tu laban nya sebagi ari chara ti tau ngerembaika penyakit.

Munyiku penerang ke baru dibantaika Menteri Besai Tan Sri Muyiddin Yasin nengah pesan khas kena malam 18 March tu tadi iya minta mensia mayuh awakka guna awak dua minggu tu diau jenuh ba rumah.

Beduduk ari tangkan ari Menteri Besai tu mega, dia chukup nyemetak semua opis perintah nyengkaum palan dagang ke mit-mit ba selampur menua udah dipinta nutup premis diri.

Ensana, ba hari keterubah gerah Atur Nagang Pejalai tu dikemeran dia agi bisi siti dua kedai makai enggau kedai gari di kandang menua Kuching agi liat enda nitihka atur nyangka agi saru dinga.

Tang pengudah kedai sida tu dilawa raban polis, dia sida dipinta nutup kedai tekala nya. Ukai semina palan dagang aja dipinta tutup tang semua program perintah mega diketu sereta dikinsil ke pemaik semua.

Program bukai mega asal begelumur lebih ari 50 iku mega enda disagi nyengkaum pengerami melah pinang, gempuru sembiang enggau sebarang aum ke mungkur mayuh mensia.

Jam ke diatu, kitai enda nemu bagi orang ti mai penyakit. Nya kebuah udah bisi chara dibantai Opis Menteri Pengerai baka ni ulih nyeliahka penyakit tu berampit.

Kesatu, kitai dipinta suah nuchi jari. Udah nya, guna sengkabung mua nyema bisi tanda tauka kelai kena penyakit tu baka batuk ti enggai badu-badu.

Kelimpah ari nya, kitai megai dilalau nyaga takah ari pangan diri. Reti enda ibuh betabi tauka betegu enggau orang bukai sekalika orang nya bakih tauka kaban belayan dampih kitai.

Nitihka pansik di menua China, dia orang ke ngembuan darah bansa A deka muntang agi kena rampit penyakit tu dibanding enggau sida ke ngembuan darah bansa O.

Pekara tu bepelasarka pemayuh pesakit ke diperubat ba menua Wuhan dia sida ke ditemu kena penyakit tu endang ngembuan darah bansa A.

Nya alai, barang sapa ti nemu diri ngembuan darah bansa A patut bejejaga. Seliah diri ari ngulu sebarang palan ke mayuh mensia dikena nyaga diri ari kena rampit penyakit ti ulih munuh nyawa.

Di Malaysia, naka tu tadi ngerikod dua iku orang udah lesi bebadi ketegal penyakit tu iya nya mungkur siku pastor, beumur 60 taun ari Gerija Emmanuel Baptist Kuching udah nadai ba Sepital Besai Sarawak urung pukul 11 pagi 17 March tu tadi.

Udah nya, pemati kedua mungkur siku lelaki beumur 34 taun ari Johor ke mega penyereta Program Tabligh ke diatur ba Masjid Jamek di Sri Petaling.