MAYUH macham chara dikena nyeliahka diri ari kena rampit igi penyakit Covid-19 ti BALAT ngerekai serata dunya lalu dikumbai sebansa penyakit pandemik.

Tebal agi, pesakit ke ditemu dirampit Covid-19 tu enda ulih gerai laban bala pakar pengerai apin tetemuka vaksin kelebih agi sida ke bisi ditepan sakit raya ti udah nabanka beribu nyawa nyengkaum dua iku di Malaysia naka diatu.

Kandang dua bulan ke udah, kitai suah ninga berita mayuh orang parai ketegal igi penyakit tu kelebih agi ba menua China di kandang menua Hubei enggau Wuhan, pun penatai igi penyakit sebedau ngerekai ngagai menua bukai.

Ketegal balat irauka penyakit nya ngerekai enggau ngerampit tubuh siku-siku mensia, bemacham chara digiga ngambi nyaga pengerai diri enggau nyeliahka diri ari kena rampit.

Bisi sekeda sanggup berambis duit lalu bisi mega sanggup ngirup ai kemi chapi laban enggai dirampit igi penyakit tu.

Bisi sekeda chara tauka utai dikena endang nyelai amat lalu nerima perati ba serata dunya tang sida sanggup laban deka gerai.

Nya alai, semua kitai patut nyaga pengerai diri lalu seliahka diri ari begelumu bebala mayuh sereta ngelawa endur ti suah ditapatka mensia mayuh.

Mensia mayuh mega patut nitihka atur tauka gerah ke udah ditetapka perintah ngambi sama nyaga pengelantang diri empu.

NGIRUP AI KEMI CHAPI

ASAL GERAI… raban Akhil Bharat Hindu Mahasabha sanggup ngirup ai kemi chapi ngambi enda dirampit igi penyakit tu.

Ba New Delhi, seraban orang bepengarap Hindu ngatur sebengkah pengawa ngirup ai kemi chapi laban sida pechayaka ai kemi nya ulih nyeliahka diri ari kena rampit igi penyakit Covid-19.

Sida mega arapka chapi tu sebansa jelu ti tuchi sereta ai kemi iya ngembuan pengelebih ari sukut ngeraika mayuh leman penyakit.

Taja pia, bala pakar pengerai madahka ai kemi chapi enda ulih ngubat penyakit riman lalu sama mega enda ulih nyeliahka igi penyakit Covid-19.

Pengawa tu diatur raban Akhil Bharat Hindu Mahasabha (Serakup Hindu India) lebuh 200 penyereta udah ngulu pengawa tu lalu pengatur mega ngarapka pengawa ke sebaka ulih diatur ba palan bukai.

“Kami udah ngirup ai kemi chapi pengelama 21 taun lalu mandi ngena tai chapi sereta enda ibuh makai ubat ari menua Barat,” ku Om Prakash, siku penyereta ti ngulu pengawa tu.

Ketuai Serakup Hindu India, Chakrapani Maharaj mega nunjukka sudu ti penuh ai kemi chapi.

Ketuai ari parti nasionalis Hindu, Menteri Besai Narendra Modi mega nyukung pengawa ngena ai kemi chapi nyadi ubat enggau ngubat penyakit riman.

Nambahka nya, ketuai ari bagi menua kadap Timur India, Assam madahka pengatur undang-undang nengeri ba sebengkah aum ninting taun bisi madahka ai kemi enggau tai chapi ulih dikena ngubat Covid-19.

Diatu, Covid-19 udah ngerampit lebih ari 138,000 enggau munuh 5,000 serata dunya tang apin tetemuka ubat ngeraika penyakit tu.

Perintah ba selampur dunya chakah bejalaika atur dikena nagang pengerekai igi penyakit dikumbai pandemik ngambi ulih mulaika pengelantang enggau pengerai mensia mayuh.

AI REMPAH

SAKANG … Mensia mayuh bendar napat enggau begau bebelika lia jerenang pengudah Jokowi madahka lia nya ulih ngubat penyakit Covid-19.

Presiden Indonesia Jokowi ngaku diri ngirup ai jamu tauka rempah ninting hari kenyau ari pengerekai igi penyakit Covid-19 laban iya pechayaka ai jamu nya ulih nambahka tikas pengerai tubuh dikena nyeliahka diri ari dirampit igi penyakit nya.

Jokowi madah, enti suba bala temuai ti ngatur pejalai nemuai basa ngagai iya dinah ai teh tang diatu semina dinah ai rempah digaga ari mayuh bansa utai tumbuh baka selali, kunyit enggau lia.

“Berindik ari pengerekai igi penyakit Covid-19 tu, aku suah agi ngirup rempah tu, maya pagi, tengahari enggau malam,” terang iya.

Media Indonesia mega bisi mantaika sekeda berita bala pakar perubat di Indonesia baka madahka apin bisi bukti saintifik sentang rempah tu ulih nambahka pengering tubuh ari dirampit igi penyakit Covid-19.

Indonesia entara menua ti dirampit pengerekai igi penyakit Covid-19 lalu naka diatu, ngerikodka siku parai ketegal igi penyakit tu.

LIA JERENANG

Nambahka nya, peranak ba Tasikmalaya Indonesia bendar begigaka lia jerenang enggau lia burak laban bansa lia nya dikeandal ulih nyadi sakang nyeliahka diri ari kena rampit igi penyakit tu.

Pekara tu ngujungka rega lia jerenang enggau lia burak niki ngenyit iya nya niki 500 peratus ari rega ngelama tu laban suah ditapatka peranak dia sereta jampat laku.

Peranak dia enda masau jam meli mayuh lia jerenang ba tamu pengudah Presiden Joko Widodo madahka pengelebih lia jerenang sereta lia tu endang ulih nyumanka mayuh leman penyakit kenyau ari kelia.

Berebak enggau nya, mayuh peranak ba Indonesia sebana madahka diri enda ampit meli lia jerenang laban jampat laku.

Rega lia jerenang ba Indonesia diatu jauh berega ari ngelama tu iya nya 80 ribu rupiah pengudah peranak begau madahka lia tu ulih nyeliahka diri ari kena rampit igi penyakit nya.

Bala pekebun dia madahka penatai pemisi sida nambah ari selama laban rega lia jerenang niki ngenyit ari rega ngelama tu sereta mar diulih laban sida di menua nya berebut meli.