KUCHING: Perintah Sarawak deka nutup semua pos adan menua enggau naka pengelengkas.

Kepala Menteri, Datuk Patinggi Abang Johari Tun Openg madah, semina Palan Kuarantin, Imigresen enggau Kastam (CIQ) antara Sarawak enggau Brunei iya nya Sungai Tujuh, Tedungan, Pandaruan enggau Mengkalap dibuka ari pukul 6.00 pagi nyentuk 8.00 pagi.

Tandu iya, semua CIQ antara Sarawak enggau Kalimantan iya nya Tebedu, Biawak enggau Lubok Antu deka dibuka antara 9.00 pagi nyentuk 3.00 lemai.

“Tu seriris enggau jam dibuka ke disetuju enggau Brunei sereta Indonesia,” ku iya rambau aum media di Wisma Bapa Malaysia, pagi tadi.

Abang Johari madah, saup ari raban soldadu dipejalai dikena ngenegap agi Atur Nagang Pejalai (PKP) ba pos adan menua enggau ba kandang menua pesisir.

Berebak enggau nya, bisi tujuh sitak “tumpuk angat” dikelala ungkup Covid-19 di Sarawak.

Ku iya sitak tu iya nya Kuching, Serian, Betong, Sarikei, Bintulu, Miri enggau Limbang.

“Penanggul ke majak nyadi tu enda ulih diteju pia aja.

“Atur Nagang Pejalai endang dikena nagang pengerekai penyakit ti balat ngenusah komuniti, nengeri enggau penatai pemisi menua, kelimpah ngeruga pengerai enggau pengelikun genap iku orang nyema enda diperesa,” ku iya.