KUCHING: Empat iku peranak Sarawak ke ngulu program Ijtimak Tabligh Dunya Zon Asia 2020 di Gowa, Sulawesi Selatan, Indonesia diatu dipatau piak bekuasa Sarawak.

Sapit Kepala Menteri, Tan Sri Dr James Jemut Masing madah, empat iku sida tu udah bekejang ke Sulawesi Selatan kena 16 Mac iya nya sebedau Atur Nagang Pejalai (PKP) diterit kena 18 Mac.

Ku iya, program Ijtimak Tabligh nya udah dikinsil beduduk ari pengerekai Covid-19 lalu sida nya diatu agi ba Indonesia.

Tandu Masing, sida tu nadai kaul enggau kluster Masjid Sri Petaling lalu sida tu diperatika piak bekuasa nyema sida tama nengah adan Kmenua di Kalimantan.

“Sida bedau pulai ke Sarawak, diatu piak bekuasa agi ngemataka pintu adan menua nyema sida tama nengah jalai chit.

“Piak Imigresen ngembuan penerang pasal sida lalu deka meri penerang ngagai kami,” ku iya madah ngagai pemberita pengudah aum media begulai enggau Kepala Menteri di Wisma Bapa Malaysia pagi kemari.

Kenu ku Masing, dikena bejejaga, piak soldadu deka mantu ngemataka adan entara menua nyema sida tama ngagai Sarawak nengah chara belalai.

Iya madah, empat ari sida nya udah dikemendar pulai ke Sarawak lalu patut beperesa pengerai sereta dikuarantin pengelama 14 hari.