SIBU: Siku ari penanyi ke tebilang enggau lagu Kapai-Kapai, Dicky J Ding baka artis bukai bela enda ulih ngelarika diri ari macham bengkah penguji ti bepun ari gaya ubah dunya.

Ubah enggau penguji ke besai nuntung semua penanyi diatu iya nya ubah ba teknologi alai bisi dipeda mensia mayuh nyau enda baka suba enggai laun bebelika VCD maya bisi lagu baru pansut.

Tang diatu tebal agi semina ninga ari laman rama lebih agi baka YouTube ari ti ngelawa kedai meli VCD.

Tu enda nyengkaum ‘lanun’ chelak tiru beambi ulih ari asil orang bukai.

Ba Dicky, iya enda nyalam ngasaika ubah nya bisi bendar ditapi iya.

“Ba penemu aku, diatu industri muzik Iban kelalu mayuh penguji.

“Ukai semina nya, penyampau penanyi baru mega majak mayuh ninting hari.

“Nya alai, aku nengah chara aku empu, semampai ngiga identiti diri. Nya kebuah aku ngaduka, nengkebang lagu aku kediri empu.

“Kebuah pia, ngambika bisi ‘trade mark’ diri empu,” pia ku iya madah.

“Ngarapka lagu-lagu enggau musik ke ditengkebang aku semampai nerima bala mayuh sereta ulih narit ari bala peninga.

“Aku enda kala tepantup ati nama utai dikemisi diri, agi mayuh utai dipelajar ba dunya pemerindang.

“Pia mega, meri besai terima kasih ngagai kaban arti lama enggau bakih aku baka Mark Benet ti seruran meri sukung ngagai aku ba dunya pemerindang.

“Mark Benet mih orang ti pemadu mantu sereta ngembing aku,” ku iya enggau jaku ti ensuruk ngujungka randau ungkup berita pemerindang serak ke sekali tu. Berita penuh ba Suara Sarawak pagila.