BALAI RINGIN: Ketegal irauka pengerekai igi penyakit Covid-19, bemacham chara dikena nyeliahka diri ari kena rampit igi penyakit ke udah nabanka mayuh nyawa nya.

Nya kebuah, mensia mayuh nitihka jalai pengarap diri empu bela besampi sereta miring minta sangkung Petara nagang pengerekai penyakit tu sereta minta sakang ke tau nyumanka pesakit Covid-19.

Raban bansa Iban ari Kampung Tuba Ulu Sebuyau udah ngena pengarap lama ti ditampung ari aki ini sida dikumbai Adat Nyukol, ti minta Petara ngampunka semua penyalah dikereja mensia ba dunya tu.

Tuai Rumah Santok Rebai madah, tuju Adat Nyukol dipejalai laban deka minta ampun ngagai Petara Langit, Petara Tanah, Petara Ai enggau Petara Bulan ketegal ulah jai dikereja mensia ngelama tu nyentuk penusah besai nyadi.

Entara penusah besai ke nyadi baka penyakit berampit, jelu ditupi bisi sakit, utai tanam mayuh rusak tauka enda bebuah manah enggau semua penyakit sereta penusah bukai nyadi ba genturung pendiau tauka kandang menua.

ENDA TAU TAMA… Orang luar enda ulih tama ngagai tanda endur ditagang ti diempang ngena wi buntak, daun nyiur enggau daun kemali.

Pia mega, adat ngampun tu dikena nyeliahka diri ari penusah besai ke benung nyadi ba menua kitai diatu.

Tukang biau deka besampi ngagai Petara, minta pengelantang, penyenang, jereki enggau diseliah ari mayuh leman penyakit berampit ngagai mensia mayuh.

Adat Nyukol agi dikemeran raban bansa Iban ba semua genturung pendiau nyentuk diatu ngambi ngampunka semua penyalah tauka muru semengat jai ba kandang menua nya.

Sebedau bejalaika Adat Nyukol tu, Tuai Rumah deka baum enggau sida serumah nentuka haribulan enggau hari bejalaika adat nya.

“Kitai udah baum entara Tuai Rumah iya nya ari ulu datai ba ili pasal adat nya enggau sida setuju miring kena 18 March tu tadi setipak enggau Perintah Malaysia berengkah bejalaika Atur Nagang Pejalai,” terang iya.

PIRING PETARA… Entara rengka piring diguna ngambi diberi ngagai Petara minta saup nyeliahka penusah besai tu.

Santok madah, genap rumah panjai deka nganjung tiga pengari lalu bisi 15 iku ari lima rumah panjai deka miring.

Lebuh miring, sida serumah enda tau pansut ari rumah ngambika pengawa nya lanchar sereta nundaka tusun pengawa miring.

Sekayu rumah panjai patut nitihka gerah ari tuai rumah ngambika pengawa tu ukai semina mujur tang ulih nyeliahka diri ari sebarang penusah bukai.

Terang Santok, pengawa miring nyukol deka diatur muak ke lemai urung pukul 6.30 lemai lalu tukang biau deka besampi panjai ngagai Petara Ai, Petara Tanah, Petara Bukit, Petara Ai, Petara Langit enggau Petara Bulan ba sungai enggau langkau sukol.

Sebedau pengawa miring dipejalai, bala indai deka ngaga piring ngagai Petara.

Entara 15 rengka piring diguna iya nya ketupat, penyaram, telu, daun letup, tumpik, penganan, asi ruas, daun sirih, kapu, buah pinang, semakau, daun rukuk, garam enggau kupi.

Nambahka nya, 15 rengka piring ke dirintaika tu tadi deka ditaruh ba dalam daun lirik, daun buan, daun pisang enggau upih pinang nyadika piring Petara.

Ba dalam Langkau sukol, bisi anak patung digaga ari kayu ti udah dirasuk pekayan perang baka ilang, sumpit, terabai enggau sangkuh.

Berebak enggau nya, jalai ke rumah panjai mega diempang ngena sumbuk nyiur, wi buntak, daun kemali dikena meri gerah tauka jaku tagang ngagai orang luar enda tau tama ngagai rumah panjai nya pengudah pengawa miring dipejalai.

Pengudah tembu bejalaika adat nyukol, peranak ba rumah panjai semak Kampung Tuba enda tau inggar enggau petang pengelama dua ngagai tiga jam ngambi enda ngachau Petara ke benung makai ari piring ke udah disedia.

Orang luar enda dikemendar tama ngagai rumah panjai pengudah pengawa nya dipejalai lalu enti sema sida udah tama sebedau pengawa miring, sida enda dikemendar pulai nyentuk hari siti.

Barang sapa ti ngelanggar adat nya, sida deka kena ukum mayar ganti rugi semua rengka piring ngagai genap rumah panjai laban udah ngachau piring ke udah diberi ngagai Petara.

Kelimpah ari nya, pengarap enggau chara kitai besampi ngagai Petara tu bisi bebida laban kitai pechayaka, semina petara aja ulih nyumanka semua penyakit ti nyadi ba dunya tu.

Mensia mayuh patut besampi nitihka jalai pengarap, ngambika semua penusah besai tu deka teputar lalu dunya deka pulai likun sereta lantang baka selama.