BAU: Indu Opis Polis Bau bejalaika atur lengkas nyekat jalai raya enggau neritka pengawa matau ba sitak Serikin dikena nagang pengerekai penyakit Covid-19.

Ketuai Polis Pelilih Bau DSP Poge Nyao madah, pengawa nya digaga dikena nagang pejalai entukar sekalika ari Malaysia tauka ari menua sepiak.

Kenu ku iya, sitak Serikin chukup diperati laban nyadi palan ke suah ditapatka mensia mayuh lebih agi maya ujung minggu (Hari Enam enggau Hari Minggu).

“Sekeda atur udah digaga nyengkaum matau sereta ngasuh tauke kedai nutup premis sida nyentuk 31 March tu.

“Kelimpah nya, raban Opis Pemansik Penyalah Bau udah diasuh matau sepanjai hari sereta meri tangkan ngagai mensia mayuh awakka diau jenuh ba rumah,” ku iya rambau dirandau pemberita, tadi.

Beduduk ari nya, iya madah semak 250 palan bedaja ba Serikin tutup ngujungka nadai palan dagang ke ulih dilawa mensia mayuh.

Tandu iya, piak sida bekerejasama enggau Kaunsil Pelilih Bau nentuka Atur Nagang Pejalai (PKP) dititih.

Ku iya, rayat ba sitak Bau tau dikumbai mereti taja bisi siku dua ayan bejalai laban ti deka ke sepital enggau bebelika barang pemakai.

“Naka tu, mensia mayuh nitihka atur sereta meri kerejasama enggau mayuh lalu sida dipinta terus ngemeranka pemeresi diri lalu meseti ngena sengkabung idung nyema pansut ari rumah,” ku iya.

Ku iya, Raban Soldadu Malaysia (ATM) diatu benung nyaga adan entara menua dikena nentuka nadai orang nguji tama tauka pansut ngagai menua tu.

Raban polis Bau dibantu sekeda kaban Batalion 11 Pasukan Gerakan Am sereta RELA ba palan ngempang jalai.