BINTULU: Akademi Raban Main Asal Dayak (ARMAD) Bintulu bisi ngajar rebak baru nebah ketebung kelimpah belajarka main asal bukai baka ngajat, bepencha enggau gendang pampat.

Kaban Kunsil Negeri (Adun) Samalaju Majang Renggi madah penumbuh palan tu patut nyadika chunto dikena ngerembai sereta ngetanka adat enggau main asal bansa Dayak.

Nengah akademi ke baka tu ulih bendar nampung sereta ngerembaika main asal kelebih agi ngagai bansa Dayak.

“Nembiak rebak baru mega dilalau ngambi ke angkun sereta rindu belajar ke main asal raban bansa enggau ke pengaya main asal kitai enggai ila diserunyut anyut dibai entali jeman dunya moden baka di diatu,” ku iya.

Majang mansut ke jakunya lebuh iya bejadi akademi nya ba pun bulan Febuari tu tadi.

Urung 1000 iku orang ke udah nembu ke pelajar sida ba main asal ngajat ti betuaika Pengajar Ding Ringkai.

“Nitih ke penerang ari Pengajar Ding Ringkai diatu nyau masuk renggat ke lapan bagi nembiak ke belajar ngajat ditu,” ku iya.

Nambah ke nya, Pengajar Ding Ringkai madah ke ngelama tu sida belajar ba rumah iya empu.

“Beduduk ari sambut ke manah amat nya kebuah aku nyau muka akademi tu,” ku iya.

Ba pengerami nya Majang bisi nyuaka chek duit sepenyampau RM6000 lalu sama bisi datai Secretary Politik Kepala Menteri Sarawak Edwin Banta mega bisi ninggal ke bekau jari RM1000 dikena meransang sereta nyukung akademi nya.