KUCHING: Semua palan bebelika barang ba menua tu dipinta ngetuka operasyen sida pukul 7 malam nyentuk 7 pagi ninting hari.

Nitihka penerang ari Komiti Penyangga Penusah Ngenyit Nengeri (JPBN), gerah nya deka berengkah diteritka ari 24-31 March 2020 ba selampur nengeri.

“Palan nya nyengkaum semua makit, palan bebelika barang besai tauka mit, kedai makai, klinik peribit, restauran, kedai 24 jam enggau stesyen minyak.

“Gerah tu meseti dititih ngambika ulih nagang pejalai mensia mayuh ke mengkang balat ba selampur nengeri,” ku penerang nya, tadi.

Taja pia, gerah nya nadai ngachau sida ke benung bejalaika operasyen nyaga pengelikun baka bala polis, soldadu, pengereja pengawa berubat enggau pemesai imigrisen.

“Tu siti ari chara bala komiti dikena mutuska rentayan pengerekai igi penyakit Covid-19,” ku tandu penerang nya.

Berebak enggau nya, genap palan bebelika barang, farmasi enggau klinik peribit dipinta ngambika nyaga takah sida ba dalam kedai.

Pejalai gerah tu deka dipatau piak polis ninting hari.

Kelimpah ari nya mega, bala pengaji dilalau ngambika seruran meresa pengangat tubuh genap iku sida ke tama ngagai kedai sida.

Kereban nyaga pemeresi baka sanitizer patut disediaka ba dalam kedai nya.

Kemari hari kelima Atur Tagang Pejalai udah diteritka ba menua tu lalu piak soldadu udah dipinta begulai enggau raban polis matau pejalai mensia mayuh ba selampur menua tu.