KUCHING: Perintah Sarawak udah mantaika 16 inisiatif di baruh Pakej Bantu Khas Sarawakku Sayang Covid-19 dikena nulung rayat ba nengeri tu.

Entara bantu belanja ungkup B40 enggau raban ti gawa ba luan iya nya diskaun bil elektrik enggau ai, diskaun ngagai pedaja nyengkaum suwa, bayar premium tanah, pengawa meri sengkabung mua pechuma sereta ke bukai.

Lebuh mantaika inisiatif tu, Kepala Menteri (KM) Datuk Patinggi Abang Johari Tun Openg madahka inisiatif tu begunaka belanja menua beungkus lebih ari RM1 bilion (RM1,154.1 juta).

“Insentif tu ngaul belanja Perintah Sarawak penyampau RM974.75 juta dikena ngurangka empas gaya ekonomi enggau ngelempungka tating penusah rayat.

“Pekara tu ditambah enggau pengawa nangguh bayar pinjau, eda dipinta mayar enggau diskaun servis pemun Perintah Sarawak penyampau RM179.79 juta ba taun 2020,” terang iya ba aum pemberita di Wisma Bapa Malaysia, ditu lemai tadi.

Sama datai Sapit Kepala Menteri Datuk Amar Douglas Uggah Embas, Datuk Amar Awang Tengah Ali Hasan enggau Tan Sri James Jemut Masing.

Abang Johari ti mega Menteri Wang madah, inisiatif dipejalai nya nagit raban ti gawa ba luan, ruang bilik enggau komuniti dagang ti begunaka sukung diatu.

“Pakej Bantu Khas Sarawakku Sayang nya sebela ungkup rayat enggau pedagang beratika empas gaya ekonomi ketegal pandemik Covid-19.

“Berebak enggau nya, tu mih inisiatif kami ngemansangka ekonomi Sarawak mansang ngagai menua maju manggai taun 2030.

“Perintah Gempung Parti Sarawak (GPS) ngasaika pemedis rayat diatu lalu kami enda nemu kemaya pandemik tu deka punas tang ngarapka kitai sama besampika pengelantang di Sarawak deka pulai baka selama,’ terang iya.

Kelimpah ari nya, Abang Johari minta semua rayat Sarawak diau ba rumah enggau nitihka Atur Nagang Pejalai.