KUCHING: Pakej Bantu Khas Sarawakku Sayang dibantaika Kepala Menteri Datuk Patinggi Abang Johari Tun Openg siti pekara ti chukup manah dikena mantu rayat nengeri tu nyengkaum rayat menua pesisir.

Kaban Kunsil Nengeri (Adun) Layar Gerald Rentap Jabu madahka 16 pakej tu endang bantu ke manah kelebih agi ngagai rayat menua pesisir laban mayuh sida ke diau ba menua pesisir kena empas ti balat berindik ari Atur Tagang Pejalai (PKP) pengelama dua minggu tu.

“Mayuh rayat ba menua pesisir baka sida ke diau ba rumah panjai enda ulih nurun gawa sereta nadai nadai bulih penatai pemisi sekumbang PKP tu dipejalai.

“Ngarapka kitai ulih besabar lalu sama meri kerejasama ngagai Opis Residen enggau Komiti Penyangga Penusah Ngenyit Ngengeri (JPBN) awakka sida ulih ngatur pekara tu enggau manah,” ku iya lebuh dirandau Suara Sarawak, kemari.

Nangkan nya, Gerald meri besai terima kasih ngagai Abang Johari laban deka meri bantu nya ngagai rayat Sarawak kelebih agi enggau gaya ekonomi sereta penusah ari pengerekai igi penyakit Covid-19 ba nengeri tu.