KUCHING: Perintah setuju timpuh mayar pinjau Wang Turu Pelajar Tinggi Nasional (PTPTN) dilanjar panjai agi iya nya ari tiga bulan ngagai enam bulan.

Menteri Besai Tan Sri Muhyiddin Yassin madahka nya nyengkaum asil gumpul penyampau RM750 juta.

“Timpuh tangguh mayar nya berengkah seharitu (23 March) ngagai 30 September 2020.

“Tu deka meri penguntung ngagai urung 1.5 juta orang ke minjau PTPTN,” ku iya.

Muhyiddin madah munyi nya ba aum pemberita pengudah ngulu Aum Kaunsil Tindakan Ekonomi di Kuala Lumpur, tadi.

Nangkan nya, iya madahka perintah mega benung beratika inisiatif bukai dikena mantu rayat rambau napi penusah dibai pengerekai igi penyakit Covid-19.

“Pengawa ti komprehensif deka diperatika Opis Menteri Wang ti berundingka genap iku rayat ba menua tu.

“Tu nyengkaum bala pedaja mit, driba teksi, sida ke bekebun, berikan, betupi. Pengereja kilang, pengereja pengawa peribit,” ku iya.

Kelimph ari nya, Muhyiddin madahka semua nya deka dibantaika iya nengah Pakej Ransangan Ekonomi enggau Bantu Rayat kenaka 30 March tu ila.

Apin lama ke udah, Perintah Besai besetuju deka nangguhka pengawa mayar pulai PTPTN ngagai semua orang ke minjau ba selampur menua tu pengelama tiga bulan nyentukka 30 Jun 2020.