SARIKEI: Mensia mayuh begau pengudah tepedaka sebuah rumah angus di Rumah Anong, Sungai Sibau Sare, ditu malam tadi.

Ketuai Balai enggau Penyah Penusah Sarikei, Mahmudin Narudin madah, penusah rumah angus tu nyadi urung pukul 12 tengah malam tang nadai penusah bebadi nyawa diripot ketegal penusah tu.

Ku iya, seraban bomba ari Balai Bomba enggau Penyah Penusah (BBP) Sarikei udah ngesah endur penusah nya nyadi pengudah nerima kangau ngenyit.

“Sebuah rumah nya udah angus lebuh kami datai ba endur urung 20 kilometer penyauh ari Sarikei nya,” terang iya.

Terang iya, bomba udah bejalaika operasyen madamka api nentuka ai enda nyerarai ngagai endur semak rumah nya.

Mahmudin madahka api mujur dipadam lengis pukul 2 dini hari lalu asil meresa, dua iku ke diau ba rumah nya beumur 55 enggau 63 taun selamat laban seduai nadai dia lebuh rumah nya angus.

“Naka tu, kebuah penusah tu nyadi apin ditemu enggau agi dipansik,” tandu iya.