SIBU: Gerempung Pemberita Sibu (SJA) enggau Institusyen Pemberita Rajang (IRJ) minta mensia mayuh anang pechaya berita bula nyerumba Atur Nagang Pejalai (PKP) Covid-19 tu.

Ba sebengkah penerang begulai tadi, Chairman SJA Hii Hiong Wee enggau Chairperson IRJ Monica Chua Chin Mei madah, mensia mayuh meseti nitihka berita ari media ti betul sereta enda ngerembaika sebarang berita ke dipeda ari media rama.

“SJA enggau IRJ nyukung PKP tu lalu kami arapka mensia mayuh diau ba rumah aja, beri kerejasama nitihka gerah ari perintah.

“Kami deka semampai nyadung berita pemadu baru ke betul ari piak bekaul.
“Kitai diau ba rumah aja lalu meda website tauka portal ari sebarang media ba menua tu,” ku iya.

Seduai mega madah, berita ke enda temu pengamat tau ngeruga pengidup komuniti kelebih agi lebuh PKP tu dipejalai.

Nya kebuah, seduai deka mensia mayuh badu ngerembai tauka bekunsi berita bula sereta enda temu pengamat ke tau ngeruga peragam orang bukai maya jam bejalaika PKP tu.

“Pekara tu mega deka ngeruga pengandal rayat ngagai perintah ti neritka atur PKP tu.

“Nya alai, kami ngarapka mensia mayuh nemu agi beratika berita ke amat tauka bula,” ku seduai madah nyemetak.

Hii enggau Chua madahka menua diatu napi pemar PKP tu lalu rayat patut beserakup enggau nitihka atur PKP ungkup pengelantang begulai.

“Lebuh napi pemar diatu, kitai enggau kami empu patut ngayanka semengat patrotik lalu nitihka atur PKP ti udah ditetap.

“Seagi semua orang bela nitihka PKP tu, kami pechayaka semua kitai likun nyeliahka diri ari pengerekai igi penyakit Covid-19 tu,” tandu iya.

Nya alai, SJA enggau IRJ ngelalau komuniti ba Sibu tetap besabar sekumbang timpuh PKP tu.