KUCHING: Perintah Besai mutuska timpuh Atur Nagang Pejalai (PKP) dilanjar dua minggu agi, nyentuk 14 April 2020.

Menteri Besai Tan Sri Muhyiddin Yassin madah, gaya kes positif Covid-19 ba menua tu agi nambah lalu disadang majak nambah.

“Pengudah nerima lalau ari Opis Menteri Pengerai (KKM) enggau Kaunsil Pengelikun Menua (MKN), perintah mutuska PKP dilanjar ngagai timpuh ke baru.

“Aku madah tumu pasal pekara tu ngambika rayat ulih ngadang utai deka nyadi sekumbang atur tu dipejalai ila,” terang iya ba aum pemberita di Kuala Lumpur, ditu tadi.

Berindik ari nya, iya ngelalau mensia mayuh enda kesal taja PKP dilanjar ngagai dua minggu agi.

“Taja perintah ngelanjarka timpuh PKP, anang irau tauka ngenyit bebelika barang laban pemakai ke bisi chukup ungkup semua,” ku iya.