BAU: Semua pekebun sawit ba menua tu dipinta mantaika penerang bekaul pengereja menua luar ngagai perintah dikena matau pengerekai igi penyakit Covid-19.

Sapit Kepala Menteri Datuk Amar Douglas Uggah Embas madah, sida bejalaika pengawa matau tu ngambi nyeliah ari bisi kes positif Covid-19 ba ladang.

“Semua kebun meseti mantaika ripot ngagai Komiti Penyangga Penusah Ngenyit Nengeri (JPBN) renggat bagi menua ti diketuai Residen dalam kandang sehari dua tu.

“Kami deka nemu raban pengereja menua luar ti gawa ba kebun engau sekalika bisi penanggul bekaul pengerai, nyengkaum sdai ke datai ngagai Sarawak enggau rikod pejalai iya.

“Pekara tu beguna amat nentuka chara bukai enti sema bisi kes positif Covid-19 ba kebun sawit.

“Nya kebuah, semua ladang patut beratka pengereja diri empu lalu mantaika penerang sida ngagai tiap Residen,” ku iya ba aum pemberit beserimbai enggau penemuai ngagai Kilang Sawit Bau, ditu ensanus.

Uggah ti mega Chairman JPBN madah, Perintah Sarawak besedia nutup operasyen ladang enti bisi ngerikod kes positif Covid-19.

“Kitai nemu ba Sarawak udah bisi sekeda ladang ditutup laban bisi kes positif, nya kebuah kami deka ngereja pengawa ke sama,” terang Uggah.

Nambahka nya, iya enda ngemendarka pengereja menua luar ke udah pulai ke menua sida empu, pulai baru kitu.

“Enti udah pansut, sida enda ulih tama baru laban kami enda nemu pekara ke nyadi din,” ku Uggah seraya madah, pengereja ti deka pulai mega enda dikemendar.

Ku Uggah, pengerekai igi penyakit Covid-19 di Sarawak nya ketegal kes import ke alai, pesakit dirampit ba luar menua baka penyereta tabligh di Kuala Lumpur.

Nya kebuah, iya madah Perintah Sarawak deka nitihka polisi nagang temuai ari menua luar tama kitu.
Ngelansa pasal Atur Nagang Pejalai (PKP), Uggah madahka mungkur 95 peratus rayat ditu udah nitihka atur tu.

“Kami ngarapka sida mengkang nitihka atur. Pekara tu nunjukka rayat Sarawak endang bejaga lalu pekara tu beguna amat, ukai semina ungkup diri empu aja tang mega ungkup kita sebilik enggau komuniti,” tandu iya,

Ngelansa pasal kilang ba Samajaya ti dikemendar beoperasyen ba timpuh PKP, Uggah madahka semua nya pemutus Perintah Besai nengah Opis Menteri Dagang Entarabansa enggau Industri (MITI).