KUCHING: Ripot kes positif Covid-19 di Sarawak diatu nurun pengudah Atur Tagang Pejalai (PKP) diterit kena 18 March tu tadi.

Kepala Menteri Datuk Patinggi Abang Johari Tun Openg madah, pekara tu berindik ari iya minta peranak Sarawak ngambi terus nitihka atur PKP enggau diau jenuh ba rumah.

‘Tiga kes positif Covid-19 ditemu ba Sarawak bepun 13 March enggau nambah ngagai 14 kes (16 March) sebedau nurun ngagai lima kes kena 18 March iya nya PKP diterit.

“Pengudah PKP diterit, kes positif Covid-19 di Sarawak nurun ari 10 kes kena 21 March tu tadi ngagai lapan enggau enam kes dua hari udah nya, sereta nurun ngagai empat kes nyentuk kemari,” terang iya.

Abang Johari mansutka jaku ba aum pemberita ba Wisma Bapa Malaysia ditu seraya disempulang tiga Sapit Menteri, Datuk Amar Awang Tengah Ali Hasan, Tan Sri James Jemut Masing enggau Datuk Amar Douglas Uggah Embas, ditu tadi.

Abang Johari nyemetak madah, penerang nya diambi dalam timpuh 14 hari pesakit positif Covid-19 dikurung.
“Enti sema kita semampai nitihka PKP nya, kitai ulih nagang pengerekai igi penyakit Covid-19 ti bepun ari Semenanjung Malaysia enggau menua China kelimpah munaska rentayan igi penyakit tu.

“ Ba timpuh PKP dilanjar dua minggu agi, kitai ngarap enggau nagit nadai agi kes positif Covid-19 ditu,” tandu iya.

Ku Abang Johari, semua positif Covid-19 nya diimport nyengkaum kluster Pastor Emmanuel Baptist Church (EBC), David Cheng ti nyadi kes pemati keterubah.

Berebak enggau nya, Abang Johari madah semua palan besai bebelika barang, kedai kupi, klinik peribit, restoran, kedai 24 jam enggau stesyen minyak ba Sarawak ditutup operasyen berengkah 7 malam ngagai 7 pagi ninting hari agi dilanjar nyentuk 14 hari.

Ngelansa pasal kes 20 rayat Indonesia dikurung ba sebengkah palan di Kota Samarahan, iya madahka sida endang semampai dipatau.

“Piak bekaul enda nemu bisi palan ngurung ba Sri Aman enggau semua sida dianjung ngagai Samarahan.

“Kami deka nitihka semua gerah enggau sanding penemu ari Opis Menteri Pengerai Malaysia (KKM) pengudah sida dikurung sekalika nganjung sida pulai ngagai menua asal tauka dikemendar diau ba ladang (Sarawak),” terang iya.

Kelimpah ari nya, Abang Johari madahka Aum Besai Dun Sarawak deka berengkah dipejalai kena 16 April tu.