KUCHING: Nadai sekat ungkup pengawa nganjung bekal pemakai sekumbang timpuh Atur Tagang Pejalai (PKP).
Menteri Betanam Betupi enggau Industri Pemakai Datuk Seri Dr. Ronald Kiandee madahka sekumbang timpuh PKP dipejalai ba menua tu, bekal enggau makit pemakai bejalai baka selama.

“Pengawa betanam, betupi, berikan enggau akuakultur dikemendar bejalaika operasyen ngambika bekal pemakai baka dagin, sayur, buah sereta ikan meruan chukup dikena rayat menua tu.

“Taja pia, semua nya meseti nitihka atur sanitasi ke udah ditetapka Opis Menteri Pengerai (KKM),” ku iya ba siti penerang berita apin lama ke udah.

Nangkan nya, servis logistik enggau perengka pengangkut ti nyukung pengawa nyendiaka bekal enggau makit pemakai nyengkaum input betanam betupi dikemendar bejalaika operasyen baka selama.

“Pekara tu ngambika bekal produk ke diguna enggau ngenyit ke dipansutka sida ke betanam betupi datai ba mensia mayuh enggau jampat sereta diterima enggau manah,” ku iya.

Kelimpah ari nya, kilang enggau kedai ke bekaul enggau bekal pemakai tu mega dikemendar bejalaika operasyen baka selama tang enggau bala pengereja ti mimit.

“Piak industri tu meseti ngemeratka tanggungpengawa beperesa pengerai dikena nagang pengerekai igi penyakit Covid-19 dipejalai ba genap renggat kompeni bekaul.

“Kebuah pia ngambika pengelikun sereta pengerai sida ke gawa enggau orang ke meli seruran dijaga,” ku iya.

Mensia mayuh ti deka nemu penerang ke silik tau betelefon ngagai Bilik Operasyen Matau Penusah Covid-19 ba lumbur 03-88701307/ 1663/ 1664 tauka emel ngagai bilikgerakan@moa.gov.my.