KUCHING: Jaguh terejun menua, Pandelela Rinong berasai lantang pengudah Lumba Olimpik Tokyo ditangguh ngagai taun 2021 berindik ari pengerekai igi penyakit Covid-19.

Nengah penerang ba akaun Instagram iya tadi, pengelikun enggau pengerai nyadi pekara dikemerat sekumbang penyakit berampit nya majak ngerekai ba menua tu.

“Pemutus nangguhka Lumba Olimpik tu meri aku awak nyendiaka diri napi lumba ikas dunya tu,” ku Pandelela ke alai diatu iya ba Kuala Lumpur belatih kediri ba rumah.

Menteri Besai Jipun, Shinzo Abe, kemari mandahka iya enggau Ketuai Komiti Olimpik Entarabansa (IOC) setuju nangguhka Lumba Olimpik Tokyo pengelama setaun.

Presiden IOC, Thomas Bach nerima manah pemutus nya laban irauka pengelikun atlit, pematih, pemesai enggau mensia mayuh ke datai meda lumba nya berindik ari penusah pengerekai igi penyakit Covid-19.