RABAN bansa Iban tauka suah agi dikumbai Sea Dayak nya raban bansa majoriti nguan menua Sarawak lalu pengidup bansa Iban kenyau ari kelia endang ngemeranka pengarap lama.

Ku Insol Harry, peranak Batu Lintang, Undop di Sri Aman madah, ari tipan sejarah penatai raban bansa Iban bisi dirikod kenyau 200 taun ke udah sebedau enggau pengudah penatai James Brooke ba Sarawak.

NAMPUNG PENGAWA

Nampung jerita aki ini menya ku iya, bansa Iban mega ngembuan mayuh pengeraja enggau pesaka asal ti seruran diibun enggau diintu meruan nyentuk seharitu.

Rebak baru mega diperansang nampung semua pengelandik, penau enggau pengalus empa jari kitai bansa ngambika semampai dikelala sereta dikemegah rebak dudi.

ANGKUNKA PESAKA ASAL… Insol Harry endang angkun deka nyaga pesaka asal tu ngambi ulih ditampung ngagai rebak dudi sereta ngelala pesaka kitai.

Nemu sereta ngelala ari ni pun penatai bansa diri beguna amat ngambi kitai nemu asal diri empu kelimpah ulih beridup nunda gaya idup ditampung bejeman pengelama, terang Insol.

Serak tu, Insol mai kitai beratika sekeda pesaka dikembuan ti dikumbai ukir, sebagi ari utai ti mai reti besai ba pengarap enggau gaya idup kitai bansa.

Terabai tu digaga ari mayuh bansa kayu nitihka penempa jari siku-siku sereta diukir nitihka pengelandik kitai empu.

RETI UKIR IBAN

Ukir kayu nya seni asal ke agi dikemeran komuniti Iban ba Sarawak lalu mayuh bansa ukir tu ngembuan reti, tuju enggau guna ba sebengkah pengawa.

LANDIK AMAT… Entara kereban bansa Iban ke bisi dijual ba sebengkah pengerami tauka pengawa mandangka pesaka lama.

Bansa Iban endang tebilang nama landik amat ngukir ngena kayu sereta pengelandik tu mengkang dikemeran nyentuk diatu baka ngukir sape, terabai enggau kereban bukai nitihka chura enggau gamal dikedeka kitai.

Mayuh macham ukir Iban baka patung tuntun ke ngembuan guna ba pengidup Iban baka dikena muru sereta nyeliahka diri ari penusah besai enggau nyaga utai tanam kelebih agi padi di umai.

Lebuh ngaga patung tuntun tu, kitai begunaka kayu kering diambi ari pendam laban sida pechayaka kayu nya bisi semengat tauka semengat ke bisi kuasa muru semua penyai.

Kereban senyata baka terabai enggau ulu duku mega diukir bansa Iban lalu sida suah ngukir mua naga ti mangah.

Ukir tuping digaga ari kayu bisi pengaruh besai lama lalu tuping tu suah mantaika semengat jai dikena ba pengarap lama.

Ukir bansa tu mega dikena ngemba anak mit ngambi enda bekesindau sebelah ruai tauka tanah maya malam hari kelimpah ngenakutka penchuri ti tama ngagai rumah.

Ukir burung kenyalang tu sebansa ukir ke chukup tebilang ba raban bansa Iban lalu bisi mega ukir bukai baka mensia, jelu, burung enggau utai tumbuh.

Patung kenyalang suah dikena lebuh bisi pengerami Gaai Kenyalang kelai bebasaka Betara enggau Sengalang Burung lalu bansa Iban pechayaka burung kenyalang ulih ngelindung sida ari semengat jai ke deka ngachau pengelantang ba rumah panjai.

Ukai semina landik ngukir ba patung aja tang bansa Iban mega landik ngukir kereban muzik asal baka sape enggau belikan ungkup dimain dikena pemnerindang enggau entudi tanda Ngajat.

GUNA TERABAI

Berebak enggau nya, Insol mega mai kitai genang pasal siti ari kereban ngayau bansa Iban dikumbai terabai.

Terabai tu sebansa senyata ke suah dikena bujang berani bekayau ngelaban munsuh lebuh menua agi siga menya.

Nambahka nya, terabai tu sebansa kereban ke meseti dibai lebuh nurun beperang kelia.

Setipak enggau pemansang, diatu terabai semina suah dipandang aja sereta nyadi pesaka raban bansa Dayak lalu suah kitai meda terabai dilekat ba dinding ngias rumah tauka suah dipeda ba hotel lima bintang di selampur dunya.

Ketegal menua nadai agi siga sereta udah likun, terabai semina dikenang aja enggau nyadi pesaka dipandang ngagai bansa enggau bala temuai ngambi meretika penatai senyata tu.

NGELINDUNG… Ukir ba terabai tu ngembuan mayuh guna enggau reti ba pengidup bansa Iban.

Ukir ba terabai tu bisi besai reti enggau guna iya ba pengidup kitai lebuh ukir nya dikena ngeringka semengat enggau ngandalka bujang berani ti deka bekayau ngelaban munsuh.

Tambah mega, ukir terabai nya nerang mayuh reti nengah litaricha, sejarah enggau adat sereta pengelandik betukang enggau ngukir terabai ngena kayu kelia.

PENGELANDIK BERI PETARA

Bansa Iban ke nemu ngukir terabai ukai semina landik aja tang genap pengukir Iban tu udah dipilih enggau diberi Petara tauka semengat bukai ngambi landik ngukir sekalika ari mimpi tauka peragam ati diri.

Entara semengat tauka Petara ba pengarap lama bansa Iban baka Keling Gerasi Nading Bujang Berani Kempang, Laja Mirah Mua Nekang Jerenang, Simpurai, Munti gerai, Sepatu Manuk Antu, Sepungga Lumpung Nangga, Pandak Segatak sereta semengat bukai.

Semengat tu endang bisi kuasa kediri empu ke tau ngelindung bansa Iban ba dunya ngambi enda alah ngelaban munsuh sereta idup likun enggau lantang.

Semua penama Petara tauka semengat dikearap raban bansa Iban tu datai ari petara perang ti diau ba menua atas dikumbai Panggau Libau.

Nya kebuah, bansa Iban arap amat petara tu bempu tanggungpengawa nyaga enggau ngelindung komuniti Iban ari sebarang penusah besai ke tau ngeruga pengidup sida ba dunya.

JERITA UKIR TERABAI

Genap ukir ba terabai nya nyelai amat sereta bisi cherita ke nyadi lebuh nya lalu bisi mega ukir tu ngembuan cherita baka Laya entara Rawing enggau Raja Merom, Laya Lang Ngindang enggau Lang Kachang, Mimpi Gemong, Burung Bubut sereta Burung Ruai enggau Belalang (Buntak Aloi enggau Buntak Rusa).

Ambika banding, cherita bekaul enggau perang entara Lang Ngindang enggau Lang Kachang lebuh Perang Pengayau kelia.

Nitihka cherita nya, Lang Ngindang nya gegetar sereta lemi lebuh tepedaka terabai dikena Lang Kachang.

Terabai dikena Lang Kachang lebuh perang Pengayau nya bisi kaul enggau ukir Iban lelaki lalu terabai dikena Lang Ngindang tu sebansa ukir terabai indu Iban.

Nya kebuah, Lang Ngindang lebuh ngena terabai ari ukir indu Iban nya iya ngasaika diri ngembuan semengat lemi enggau betukar nya siku bujang berani Iban ti kasihka munsuh iya.

Ukir nya ngasuh Lang Ngindang berasai lemi laban ukir ba terabai nya ngembuan guna kediri empu.

Jeman kelia, semua bujang berani Iban meseti bejimat milih bansa terabai enggau ukir laban bansa terabai nya deka nentuka sida menang tauka alah lebuh beperang.

Nya alai, geanp ukir asal ukai diukir sengapa tang meseti nemu guna enggau sejarah sereta semengat kediri empu laban terabai dikena lebuh beperang deka nambahka semengat enggau pemerani ngelaban munsuh.

Kemaya hari, terabai tu suah agi dipandang enggau nyadi pesaka ngambika senyata lama enda lenyau ngapa lalu rebak dudi ulih nemu sereta ngelala bansa senyata tu.

“Rebak dudi patut nyaga manah pesaka asal kitai laban bansa Iban endang ngemeratka adat enggau main asal ke semampai ditampung nyentuk diatu, “ku Insol nyimpul kenang.