SIBU: Serakup Pengajar Sarawak (STU) setujuka pengawa ngajar enggau belajar (PdP) mengkang dipejalaika nengah sistem on–line sekumbang timpuh Atur Tagang Pejalai (PKP) tu.

Presiden STU Macky Joseph madah, Opis Menteri Pelajar (MOE) udah ngenataika gerah nya ngagai bala pengajar tauka bala pengelicha tau nguna sistem on-line baka kelas google, ngajar nengah telegram, WhatsApp sereta chara teknologi ke bukai.

“Sekeda bala pengajar udah bekenaka inisiatif tu ba bala nembiak sida nyerumba PKP benung diteritka maya jam diatu.

“STU nyukung amat penemu MOE ti ngasuh bala pengajar bekenaka inisiatif nengah on-line ngambika nembiak semampai belajar,” pia ku iya nengah penerang media, kemari.

Macky mega madah, bala pengajar mega udah bisi ngaduka video dikena sida ngajar lalu diberi ngagai bala apai indai ngambika dikena belajar di rumah maya jam diatu.

“Kitai berasai temegah ati enggau pengeransing ke udah diayankan pengajar tu.

“Kelimpah ari nya, STU ngarap bala apai indai meri awak mimit berati sereta ngembing anak sida belajar ngena sistem nya,” ku iya madah baru.

Iya mega madah, diatu bala apai indai megai tanggungpengawa nyilih pengajar nentuka anak sida belajar di rumah taja agi maya kemisi tauka PKP agi diteritka.

“Beratika anak kitai enggai ke sida kelalu masau jam nyengkaum bekenaka telefon sida.

“Maya diatu, kami andal amat apai indai bisi awak ngembing anak sida belajar di rumah,” pia ku iya nangkan baru.

Taja pan baka nya, ku Macky, endang sigi bisi bala nembiak enda ulih magang bekenaka internet ketegal menua empai datai arus penyambung nya.

“Amat pan baka nya, sida tau belajar kediri sereta enda masau jam ngereja pengawa ke enda menuku,” ku iya sambil ngarap apai indai enggau bala anak sida bela nyaga sereta ngintu pengerai diri di rumah nitihka PKP.