Atur Tagang Pejalai (PKP) udah ditampung perintah besai nyentuk 14 April 2020 dikena mutuska rantai penyakit Covid-19 ti benung ngerekai jam ke diatu.

Naka 25 March tu tadi penyampau rayat di menua tu ke udah dikenuku positif Covid-19 majak nambah iya nya bisi1796 iku (nyengkaum kes baru 172 iku), penyampau orang ke udah bebadi nyawa bisi 18 iku nyengkaum siku lutur.

Nya penyampau di Malaysia aja, diselampur dunya naka tu sida ti kena rampit penyakit tu bisi 422, 829 iku lalu penyampau orang ke udah lesi bebadi manggai 18, 907 iku.

Nya alai, rayat di selampur menua Malaysia dilalau bela diau di rumah sekumbang timpuh PKP ke berengkah dipejalai perintah kenyau 18 March tu tadi awakka penyampau sida tu kena rampit enggau bebadi badu nambah.

Dalam timpuh tu, kitai anang sesekali ngulu sebarang program ti mayuh mensia, anang lama lebuh bebelika barang ba luar, jaga takah penyauh semeter ari orang bukai, asuh anak belajar ba rumah aja, seliahka nguna kereban pengangkut luar, tau enda ibuh betemu enggau orang luar sekalika nya kaban belayan ke besemak.

Berebak enggau nya, sida ke benung ba rumah panjai endang ditangkan enda ibuh undur ke mengeri tauka pasar besai. Anak ke benung kemisi sekula dilalau terus belajar ba rumah.

Diatu semua opis endang tutup nyema bisi pekara berat deka diadu tau digaga nganti timpuh PKP tu udah abis.

Taja pia, perintah naka ulih nentuka semua bekal pemakai endang chukup dijual ba kedai. Sekeda servis ke beguna mega meruan bejalai baka selama baka servis karan, ai, ngumpul uras, entali ai, komunikasyen enggau pengelikun mensia mayuh.

Maya tu, semina siku aja diri sebilik dikemendar nurun ari rumah ungkup tuju bebelika barang ke diguna baka meli barang pemakai enggau barang guna ke bukai.

Tambah mega, jam diatu perintah udah neritka atur semua kedai semina dikemendar dibuka ari pukul 7 pagi nyentuk 7 malam. Lepas pukul 7 malam, dia barang sapa ditemu bekesegau nadai kebuah deka ditangkap lalu diukum nitihka atur ke udah ditetap.

Taja pia, dikena napi pemar baka putus pengawa ngagai raban ti begaji hari tauka putus penatai pemisi ba raban orang dagang mit enggau besai dia perintah udah ngerintaika sekeda atur awak ngelempungka tating penusah ke benung ditapi rayat.

Entara bansa bantu tu, perintah besai udah meri pemendar ngemansutka wang KWSP penyampau RM500 sebulan ungkup timpuh 12 bulan, nangguhka bayar PTPTN pengelama enam bulan, ngambi 2000 iku staf baru ungkup sektor perubat sereta nganggauka baru 3000 iku sida ke udah pinchin dikena nyaup napi penusah ba sepital perintah, kelimpah ngungkupka agih belanja RM600 juta ngagai KKM.

Menteri Besai Tan Sri Muhyiddin Yasin mega nengah pemutus randau enggau Kaunsil Pengatur Ekonomi menua setuju ngagihka belanja RM130 juta ngagai semua nengeri dikena napi penusah ketegal Covid-19.

Ungkup rayat Sarawak, perintah nengeri nengah penerang dibantaika Kepala Menteri Datuk Patinggi Abang Johari Tun Openg udah ngerintaika 16 bengkah tulung tauka pakej bantu ngagai rayat di nengeri tu sekumbang timpuh napi pengerekai penyakit tu.

Entara nya, meri bantu RM250 pengelama enam bulan ngagai semua rayat kategori B40, meri sengkabung mua pechuma, putung bayar chukai ngagai raban pedaja, pupu pintu, suwa enggau premium tanah enggau mayuh agi ke bukai.

Enda tinggal nerima bantu khas ari perintah besai enggau perintah nengeri iya nya raban ke gawa ba luan baka pengereja pengawa ba sepital, soldadu, polis, raban imigresen enggau ke bukai.

Raban lutur, misi enggau pengereja pengawa bukai ba sepital bela deka nerima bantu RM300 sebulan, raban imigresen, polis soldadu enggau Rela Sarawak diberi RM200 sebulan enggau mayuh agi bantu bukai.

Pemar jauh ari diri sebilik, pengelelak ngintu pesakit ti majak mayuh ngujungka raban sida tu gawa siang enggau malam. Perintah
meruan ingatka pemanah pengawa sida lalu mensia mayuh patut besampika pengelikun sida lebuh ti bejalaika pengawa.

Nya alai, kitai rayat mayuh patut bekerejasama nitih atur ke udah ditetap awakka rantai penyakit tu jampat punas tauka putus dikena nyelamatka rayat enggau menua kitai Malaysia.