BINTULU: Rayat di menua tu kelebih agi nembiak rebak baru muji pementas perintah ti udah ngungkupka internet nadai bebayar bepun ari 1 April sampai Atur Tagang Pejalai (PKP) tembu ila.

Ku Darren Anak Undie, pemutus tu nunjukka perintah enda nyendiaka agih ke badas ketegal ulih diasaika semua rayat.

“Kenyau ari Atur Tagang Pejalai tu suba, mensia mayuh endang diau ba rumah, nya alai pemutus perintah ngungkup ke pemutus sida bekaul enggau internet tu sigi engkeman bendar,” ku iya.

Darren mansut ke jaku nya, lebuh ke dirandau pengarang berita, kemari.

Nambah ke nya, iya madah internet beguna bendar kelebih agi ba dunya nadai beadan baka ke diatu.

“Ketegal ke bisi internet tu mega ngasuh ati enda sunyi, bala mayuh pemerindang ari ke bisi internet,” ku iya.

Ba ungkup tu, Menteri Besai Tan Sri Muhyiddin Yassin unda ngungkupka sepenyampai RM600 juta nengah Pakej Nyungkak Ekonomi Rayat.

Pakej tu bepun ari PKP ti benung dipejalaika lalu dikena napi pesusah rayat lebuh nagang pengerekai igi penyakit Covid-19.

Ba penemu Mohd Amirul Abdullah mega, awak tu tau bendar dikena bala nembiak ke benung besekula begiga ke penemu sida ngena internet.

“Bala nembiak ke benung pemisi sekula ketegal PKP bisi peluang begiga ke penemu sida nengah internet ke nadai bebayar”.

“Sida ulih bekelimat ke belanja bebeli kredit ketegal ngulih ke internet”.

“Ngena awak tu mega meri besai amat penguntung ngagai nembiak enggau bala pengajar laban bisi sekeda pengajar diatu udah mupuk ngajar nengah chara on-line,” ku iya.

Berebak enggau nya Joenathan Jugah mega sama sepenemu madah, ungkup tu meri penguntung ngagai orang ke bedaja ngena arus internet.

“Pelajai mensia mayuh diatu bisi disekat mimit, nya alai internet ke bisi tu ulih dikena sida ngudar barang baka pemakai, barang diguna ninting ari enggau utai bukai”.

“Diatu bisi kedai udah nyendiaka servis sida bejual ngena internet lalu sida empu ulih nganjung ke rumah kitai,” ku iya.

Lebuh ke dirandau sida tiga nyemetak madah, internet ke nadai bebayar ke udah diungkup ke perintah tu mega siti ari chara ulih nagang pengerekai Covid-19 laban mensia mayuh ulih jenuh diau di rumah ketegal bisi internet.

DARREN UNDIE

 

MOHD AMIRUL ABDULLAH

 

JOENATHAN JUGAH