Penanyi Iban rebak baru dilalau meseti ngembuan ati tegap sereta tan dipangka penguji ba dunya pemerindang.
Pia mega arapka raban pengemeran industri muzik lagu Iban diperansang seruran bebendar ngangkatka kualiti lagu diri awakka terus pegari ba mata dunya.

Siku penanyi veteran tauka dikumbai “evergreen” iya nya Johny Aman, 56 taun madah, industri muzik Iban majak ngerembai lalu diterima bansa bukai.

Kebuah pia laban lagu-lagu kitai Iban meruan bisi didinga ba churung stesyen radio bansa bukai baka ba radio Bidayuh, Kayan Kenyah enggau ke bukai.

“Penanyi rebak baru chukup betuah laban semua kereban kena nengkebang sereta ngiring sida ke belagu udah moden, enda baka kelia.

“Banding enggau menya, diatu majak mayuh penanyi baru ya ke biak sereta landik pansut besemekih ba dunya pemerindang nyadi nya kebuah aku ngelalau sida anang enda liat ati,” ku iya maya dirandau Suara Sarawak.

PERAMBU BARU…Johny Aman merambu deka ngerikod album baru begulai enggau Josephine Jalin

ALBUM KETERUBAH

Album keterubah Aman maya baru angkat nyadi penanyi kelia diberi nama Makai Tinduk Nadai Kereja ke dikeluarka Lian Sing Music City ba Sibu.

Udah nya, Aman mujur ngerikod bemacham agi album urung 70 buah album nyengkaum album solo, kompilasyen enggau lagu Gawai Dayak.

Kelimpah ari nya, Aman ukai semina digelar siku penanyi tang iya mega landik nyadi komposer (nusun muzik) ngujungka iya udah mayuh ngangkatka nama bala penanyi Iban baka Andrewson Ngalai, Ricky El, Sima, Rickie Andrewson, Winnie Albert, Rosiana Urai enggau ke bukai.

Diatu, Aman benung ngaga siti album ke semak amat ba ati ya udah album solo iya kepenudi dikumbai “Aku Nadai Adong Belalai.

TEMEGAH ATI…Siti ari album diberi nama Bulu.

“Diatu, aku benung ngaga album duet ke anak aku ianya Joannes enggau Jecklyn ti dikeandal aku ulih nyambung pengawa aku ba dunya pemerindang udah tu ila.”

“Kepenudi tu ila aku bisi langgur ngerikod siti agi album solo baru nampung album duet begulai enggau Josephine Jalin.”

Nama resia pemujur ulih beretan lama ba dunya pemerindang.

Aman madah kebuah ulih beretan lama iya nya nadai resia bukai iya nya ketegal bisi pengeran, pengeransing enggau tan nempuh penguji.

“Nya alai, aku ngarapka penanyi rebak baru anang enda nakal napi penguji lebuh datai.”

KENA JAYAU TUBUH SULU…Gambar kulit album maya agi biak.

NYAGA SADA NYAWA

“Baka aku nadai tentu bepenti kena nyaga sada nyawa tu tang aku bisi ngurangka makai utai ke pedas enggau beminyak.”

“Aku arap artis baru diatu enggau naka ulih ngemansangka industri muzik kitai Iban.”
Ba pengujung randau Aman ke udah manggai 56 taun meri terima kasih ngagai semua bala peminat ya ke agi ingat ke ya lalu nyukong ya selalu.