KUCHING: Komiti Penyangga Penusah Ngenyit Nengeri (JPBN) enda ngemendarka pengawa bejalai ngagai pelilih menua bukai, ku Sapit Kepala Menteri Datuk Amar Douglas Uggah Embas.

“Semadi bisi penusah ke enda ulih diseliah aja dikemendar lalu patut bisi pemendar ari Opis Pelilih (DO) diri empu,” ku iya rambau aum pemberita diatur, ditu kemari.

Kelimpah nya, iya ke mega chairman JPBN madah semua pengereja pengawa ba pantar minyak enggau gas nyengkaum ari luar Sarawak dipinta nitihka atur kuarantin pengelama 14 hari sebedau ngelawa pantar ba nengeri tu.

Berebak enggau nya, Uggah madah Sarawak udah ngelala 13 endur palan kuarantin ke ulih dikena.

Ku iya, tu nyengkaum ba Palan Latih KKM Kuching, Kampung Sukan Petronas Miri, Kem Belia Kemunyang Sibu, Stadium Tetutup Limbang, Taman Negara Similaju Bintulu, Stadium Tertutup Lawas, Rumah Temuai Kapit, Institut Pembangunan Desa (INFRA) KOta Samarahan, INTAN Kota Samarahan, Rumah Penyangkai Sri Aman, Kolej Kejururawatan Sibu, Dewan Suarah Limbang enggau Institut Kemahiran Islam Malaysia Sarawak (IKMAS) Kuching.

Iya madah JPBN mega benung ngiga palan ke engkeman nyadi palan kuarantin ba pelilih menua bukai.

Nangkan nya, Uggah madah gerempung ukai perintah (NGO) enda dikemendar nganjung barang bantu Covid-19 ngagai penerima.

Semua NGO semina dikemendar nganjung barang pemakai ngagai Opis Pengintu Pengelantang Mensia Mayuh (JKM).

“Kitai enggai orang peneka pansut ari rumah ketegal nganjung barang pemakai,” ku iya.

Kenu ku Uggah Opis JKM deka dikena nyadi palan ngempuruka barang bantu.

“Sebarang pemeri meseti nengah sekretariat JPBN,” ku iya.

Kelimpah ari nya, Uggah madah piak polis udah nangkap urung 162 iku orang ba selampur nengeri tu ke ngelanggar Atur Tagang Pejalai (PKP) kenyau 25 nyentuk 29 Mac tu tadi.

Ku iya, lapan iku ari sida nya udah didawa ba kort, lima agi ke bukai deka diukum jil dua ngagai empat bulan enggau tiga iku ke bukai mega deka diukum.

Iya ke bukai deka didawa ba kort bepun pagila (sehari tu),” ku iya.

Datuk Amar Douglas Uggah Embas