SIBU: Serakup Pengajar Sarawak (STU) siti serakup ti megai tanggungpengawa ke besai ngangkatka tikas pengidup peranak Sarawak dalam sistem sekula sekumbang ditumbuh 55 taun ke udah.

Presiden STU Macky Joseph madah, STU ditumbuh kena 29 March 1965 udah ngayankan pengeransing ngambika mengkang relevan sereta besemekih ba renggat antarabansa ba tuju ngembing tiap iku nembiak enda tinggal ari pelajar.

“Belabuh ari semina 600 iku raban aja, diatu STU siti serakup pengajar ke pemadu besai kelimpah dipebasa orang ba menua tu.

“Semua pemujur ke dipeda nyentuk sehari tu bepun ari sukung enggau pengeransing semua raban ti ngujungka kitai ngembuan raban ti kering sereta besai reti ngagai pemansang nengeri enggau menua,” pia ku iya madah beserimbai enggau penumbuh ke-55 taun STU, kemari.

Ngelansa sentang pejalai STU ngelama tu, ku iya, gerempung sida nanggam kerejasama ke manah enggau institusi ke bukai nyengkaum kompeni insurans ti mega dikena nentuka pengelikun rama raban sida.

“Taja pan pia, kaul ti besai ba kami iya nya begulai enggau Opis Menteri Pelajar,Opis Pelajar, Perintah Nengeri enggau Perintah Menua.

“Kaul enggau sukung ari semua tu nentuka STU mengkang ulih bejalaika tanggungpengawa ti mega mai bala raban kami mengkang chakah meri servis ngagai pemansang nengeri enggau menua kitai,” ku iya madah baru.

Kelimpah ari nya, ku Macky, ngelama tu mega sida naka alah ngerembaika tanggungpengawa sida lebih agi ba renggat antarabansa nengah Education International (EI) enggau Kaunsil Pengajar ASEAN (ACT).

“STU ngembuan juluk ati deka nyadi tuai pengatur Gempuru ACT ba taun 2021.

“Kami mega bisi perambu deka ngatur ASEAN Teachers Exchange Programme sereta mayuh perambu ke bukai,” pia ku iya maya ngerintai singkang STU nangkan ke tu.

Ngenang penusah ke nyadi maya hari tu iya nya pengerekai COVID-19 , Macky madahka STU besetuju enggau penemu nandu pengawa ngajar enggau belajar nengah sistem on-line baka Google Classroom, Telegram, WhatsApp sereta laman media bekaul ke bukai ketegal menua benung bejalaika Atur Pejalai Betagang (MCO).

“Kepenudi kitai meri besai terima kasih ngagai semua pemesai enggau semua raban enda ngira ba indu opis tauka ba renggat sitak menua ketegal kita udah meri sukung ke pemadu manah ngagai STU ngambika mengkang pegari nyadi serakup pengajar di Sarawak sereta di Malaysia,” ku iya.