SARATOK: Raban pedaja Tamu Kaunsil Pelilih Saratok (MDS) ditu nyambut manah pemutus natak jam alai bedaja.

Bujang Lukong,56 taun madah, pemutus perintah nengeri ngemendar semua Palan Pedaja Mit dibuka apin lama endang pemutus ke dianti.

“Ukai enda irau ke pengeregau menua diatu laban Covid 19 tang penatai belanja kena kami sebilik beridup ketebal agi asil ari pengawa bedaja.

“Nya alai,pemutus Kaunsil Pelilih Saratok (MDS) ngemendar kami bedaja pengudah nerima gerah ari Komiti Penyangga Penusah Ngenyit Nengeri (JPBNS) nengah Kaunsil Kandang Menua (PBT) apin lama disambut kami enggau lantang ati,”ku iya.

Bujang Lukong mansut penemu munyi nya lebuh dirandau pemberita ti bisi limpang enda lama ngelawa Tamu MDS seraya berati gaya ulah enggau sambut mensia mayuh ba hari ketiga tamu dibuka pengudah tutup kenyau ari tengan bulan March tu tadi.

BISI BEDAJA…Bujang Lukong benung ngerandau mensia mayuh ti datai meli sayur.

Lebuh ditanya bekaul enggau jam awak alai bedaja ti sempil iya madah, nya nadai pulai ke penanggul nuju bala ti bedaja ditu.

“Taja bisi tatak jam alai bedaja tang pekara nya nadai nanggul ba kami sebuat ditu.

“Aku mega muji pemutus MDS natak jam bedaja rambau diatu laban enggau nya kitai ulih sama besaup nagang pengerekai igi penyakit tu (Covid 19) sereta kami (pedaja) mega bisi awak begiga belanja mimit taja jam nyau pandak.”ku iya nyemetak.

Ungkup penerang,Tamu MDS berengkah ditutup kena 20 Mac 2020 tu tadi berindik ari gerah perintah nengeri dikena nagang pengerekai igi penyakit Covid 19 ke mega nyentuk berita tu ditulis nadai udah peranak Pelilih Saratok,Kabong enggau Roban udah kena rampit sereta mengkang ba zon ijau berindik ari ripot ari Opis Pengerai Menua (KKM) sehari tu tadi (30 Mac 2020).