SIBU: Parti Pekerja Sarawak (SWP) bisi nerima nerima info pasal peranak rumah panjai ba menua pesisir di nengeri tu suntuk barang pemakai enggau barang bukai nyerumba Atur Tagang Pejalai (PKP) ti masuk hari ke-12, kemari.

Pemangku Sekeretari Besai iya, Lavenia Mawas madah, pemakai sereta barang ke diguna nya semua datai ari mengeri.

Nya alai, SWP madah, minta perintah nengeri matau sereta ngenukuka pekara tu enggau lengkas.

“Ba Kapit patut diperati enggau berat laban majoriti rayat ke diau ba rumah panjai bedau ulih lawa ngena jalai raya.

“Sida agi bepanggai ngagai jalai sungai, enti deka ngelawa sida umbas pengelama,” ku iya madah nengah sebengkah penerang, kemari.

Iya mega madah majoriti rayat rumah panjai nyau jarang bumai tang agi bisi kedua begigaka asil babas ungkup dijual nyadika penatai pemisi.

“Beduduk ari pengawa muka kebun dandang besai enggau aktiviti nebang batang ngujungka asil babas sida udah jauh kurang.

“Nya alai, kami bisi nerima info ari orang ti madah rayat rumah panjai jam diatu suntuk pemakai enggau barang guna ke bukai,” ku terang iya.

Iya madah, laban perintah nengeri udah bulih agih besar ari perintah besai nengah Pakej Nyungkak Ekonomi Sinuka Rayat (Prihatin) nyadi endang tanggungpengawa sida perintah nengeri nentuka rayat ba menua pesisi diberi bantu nitihka pematut sereta lengkas.

Nya alai, kenu ku Lavenia, SWP merambu peminta sekumbang timpuh PKP tu semua belanja nya meseti diterima enggau dipatau kelimpah diaudit awakka nadai siku orang tinggal.

“Perintah patut berundingka chara pemadu manah ngambika bantu ke diberi nya enda teberayan sereta jampat datai,” ku iya.