MIRI: Parti Sa’ati Rayat Sarawak (SUPP) udah nyuaka pemeri kereban nyaga diri (PPE) ngagai Opis Bomba enggau Penyah Penusah (JBPM) Miri ditu ngambi mantu sida lebuh bejalaika pengawa perintah nagang pengerekai Covid-19.

Pemeri nya asil kerejasama ari mayuh gerempung ukai dikuasa perintah (NGO) meri utai diguna ngambi meresi endur ditemu zon mirah.

Entara barang tu iya nya sengkabung mua, perungkup mua, sarung jari, gogal pengelikun enggau ke bukai.

Menteri Muda Dagang Temuai, Datuk Sebastian Ting ti mega Ketuai SUPP Piasau udah nyuaka bantu nya ngagai Ketuai Opis Bomba enggau Penyah Penusah (JPBM) Miri, Law Poh ba stesyen Balai Bomba enggau Penyah Penusah (BBP) Lopeng, ditu kemari.

“Aku dipadahka Bomba Miri ditu suntuk barang baka tu lalu sida mega nadai agih belanja dikena meli semua kereban nyaga diri ke beguna baka meresi endur nya lebuh napi penusah besai baka tu,” terang iya.

Nya kebuah lebuh dirandau pemberita pengudah nyuaka barang, iiya madah lebuh meda pemar ditapi raban bomba, piak SUPP Piasau begulai enggau gerempung ukai dikuasa perintah (NGO) udah bekerejasama nyaup nyuaka pemeri barang diguna.

Ku Sebastian, kelimpah staf perubat, raban gawa ba luan baka polis, soldadu enggau bomba mega meseti diberi kereban nyaga diri enggau sukung ngambi nagang pengerekai Covid-19.

Berasai gaga nerima pemeri nya, Poh Kiong mega meri besai terima kasih ngagai sida ke beratka penusah ditapi sida lebuh napi pengerekai igi penyakit Covid-19.

Pengudah pengawa nyuaka semua kereban, iya bisi meri penerang bekaul ngena ‘Bio Hazard Decon Canvas’ ngagai Sebastian.

“Decon Canvas tu deka diengkah ba tanah ngambi munaska pengamah,” terang iya.