KUCHING: Tuai Pemegai Menua Tun Pehin Sri Abdul Taib Mahmud meri bantu kereban berubat sereta perengkaguna ungkup wad sakit raya (ICU) di Sepital Besai Sarawak (HUS), tadi.

Nitihka penerang ari Astana Nengeri, entara kereban enggau perengkaguna ke diberi nyengkaum seunit Portable Ultrasound Linear Probe, lima unit kereban Anti DVT, dua unit Fibreoptic Scope enggau dua unit Syringe Pump beungkus RM120,500 ke guna wad ICU dikena merubat sida ke dirampit igi penyakit Covid-19 ba sepital nya.

Semua bantu nya diserahka Sekretari Sulit Kanan Taib, Datuk Mustapa Han ngagai Direktor HUS Dr Nguan Hie Ung enggau Ketuai Opis Anaestesiologi enggau Sakit Raya HUS Dr Teon Shu Ching di opis iya, ditu.

Kelimpah ari nya, Taib mega meri bantu 700 bungkus oemakai enggau ai mineral ngagai Bilik Gerakan IPK Sarawak ngambika diagihka ngagai raban Polis Diraja Malaysia (PDRM), Raban Soldadu Malaysia (ATM) enggau Rela ke gawa ngetan ba jalai alun pemanjai timpuh Atur Tagang Pejalai (PKP).

Berebak enggau nya, Taib minta ngambika rayat Sarawak ulih meri kerejasama sereta nitihka atur PKP ti udah dilanjarka nyentuk 14 April 2020.

Ku iya, pekara nya beguna bendar ba pengawa kitai nagang pengerekai igi penyakit Covid-19 laban nya nyadi tanggungpengawa semua rayat menua tu.

Kerejasama rayat Sarawak chukup beguna ngambika sida ke gawa ba luan ulih meri fokus ngagai pengawa mansik, merubat sereta nagang pengerekai igi penyakit tu, ku Taib.

Taib mega ngelalau mensia mayuh ngambika enda mudah pechayaka berita bula ba media rama sereta semina ngulihka berita enggau penerang ti betul ari Opis Menteri Pengerai Malaysia (KKM) enggau piak penerit adat.

NERIMA BANTU… Hie Ung (dua kanan) nerima bantu ari Mustapa (kanan) ba opis Taib ditu, tadi.