ENGKILILI: Perambu muka palan kuarantin di sitak Engkilili enggau Batang Ai naka ke diatu enda patut laban sitak di baruh Bagi Menua Sri Aman bedau ngerikod sebarang kes positif penyakit Covid-19.

Adun Engkilili Dr Johnnical Rayong Ngipa madahka naka ke diatu, sitak iya nya agi likun ari kena rampit igi penyakit Covid-19 laban rayat bebendar nyaga pengelikun diri pemanjai timpuh Atur Tagang Pejalai (PKP) tu.

“Sitak tu siti sitak ke mit, lalu enti bisi orang dipelaba (PUI) Covid-19 diengkah ba palan kuarantin di Engkilili, kitai irau enggai ke sida PUI nya positif Covid-19 lalu ngerampit ngagai sida ke bukai.

“Ukai nya aja, di Engkilili mega nadai perengkaguna ti chukup ari sukut penyampau orang ke gawa, pengelandik enggau kereban teknologi,” ku iya madah ba siti penerang, kemari.

Ku Rayong, ukai semina perengkaguna tauka kereban teknologi berubat aja enda chukup ba sitak iya tang mega sengkabung mua mega enda chukup ba sitak nya.

Dr Johnical Rayong Ngipa

Nangkan nya, iya minta ngambika piak ke bekaul enggau pekara tu patut berundingka baru pengawa numbuhka palan kuarantin di Engkilili laban majoriti peranak sitak nya enda besetuju enggau pekara nya.

Berebak enggau nya, siku ari tuai rumah ari Empelam, Engkilili, Tr Pendy Gerang mega mantah palan kuarantin ditumbuhka ba sitak nya enggau Batang Ai laban menua sida agi likun ari igi penyakit Covid-19.

“Siti ari endur ti dipilih nyadi palan kuarantin ba Engkilili iya nya Rumah Rehat Engkilili.

“Enti diperatika enggau manah, palan tu besemak enggau Kuarters Perintah sereta rumah panjai baka Merbong, Bua, Bukong, Sungai Menuang, Selindung Ulu, Selindung Ili enggau sekeda rumah kediri ke bukai,” ku iya.

Ku Tuai Rumah Pendy, pengawa numbuhka palan kuarantin ba endur ke agi likun ari igi penyakit Covid-19 nya baka ke nganjung penyakit nya ngagai menua nya.

Tr Pendy Gerang

“Pekara tu patut dikerandauka dulu enggau bala pengari rayat ba sitak tu laban kami endang enda besetujuka palan tu ditumbuhka ba ditu,” ku iya madah nyemetak.

Apin lama ke udah, siku menteri muda madahka buding pelatih Jururawat Masyarakat Opis Pengerai Bagi Menua Sri Aman diperambu nyadi palan kuarantin kedua penyakit Covid-19 berindik ari palan kuarantin keterubah di Rumah Rehat Opis Pelilih Sri Aman semina ulih endur lima iku orang ke sakit aja.

Kelimpah ari nya, Palan Servis Komuniti Adun Batang Ai enggau Rumah Rehat Opis Pelilih Mit Engkilili diperambu nyadi palan keempat enggau kelima dikena kuarantin sida ke kena rampit igi penyakit Covid-19 tu.