KUCHING: Sarawak ngerikod siti kes bebadi nyawa ketegal Covid-19, ditu tadi.

Menteri Pengawa Berumah enggau Kaunsil Kandang Menua Datuk Seri Dr Sim Kui Hian madah, kes bebadi nyawa ngaul siku pengelicha ba sebuah palan pelajar tinggi ba Kota Samarahan.

“Kemari, Sarawak ngerikod dua kes bebadi nyawa ketegal Covid-19. Dua kes ngaul siku lelaki berumur 47 taun di Kuching enggau siku indu berumur 41 taun di Miri agi benung dipansik,” ku iya ba aum pemberita pasal Covid-19 ditu tadi

Ku iya, bisi 21 kes positif baru diripot kemari ke alai 20 benung diperubat ba Sepital Besai Sarawak (SGH) lalu siku ba Sepital Sibu.

Nangkan nya, Kui Hian madahka sida benung nambahka kapasiti meresa ngena Polymerase Chain Reaction (PCR) dikena mansik mayuh agi kes positif ba nengeri tu.