Taman Negara Similajau sedia nyadi palan kuarantin kes Covid-19

BINTULU: Palan Kuarantin penyakit COVID – 19 di Taman Negara Similajau, ditu udah disikap endur nerima pesakit ti dianjung ngagai palan nya sebarang maya.

Sapit Kepala Menteri Datuk Amar Douglas Uggah Embas madah pengawa nyediaka palan nya (palan kuarantin) endang atur tumu dikena ngurung sereta merubat sida ke kena rampit penyakit tu.

Ku iya, Perintah Sarawak chukut beratka pasal pengerekai penyakit (COVID-19) beduduk ari Gerempung Pengerai Dunya(WHO) udah ngerah penyakit tu nyadi keruga besai dudi hari.

Lebuh mantaika penerang ngagai raban pemberita nyerumba penemuai enda lama ngagai Palan Kuarantin penyakit Covid-19 di Taman Negara Similajau, Uggah ke mega Chairman Penyanga Penusah Sarawak madah naka tu,

Sarawak ngerikod 11 kes pemadu baru positif igi penyakit Coronavirus (COVID-19) lalu ngujungka bisi 20 kes semua nya dikenuku positif virus.

Ari penyampau nya, siti kes nyadi di Bintulu lalu pesakit nya benung diperubat ba Sepital Bintulu, ku iya seraya maya darahorang ke sebilik enggau pesakit nya udah diperesa lalu nunjukka pemutus ti negatif.

Nitih penerang, pesakit nya siku ari 90 iku sida ke datai ari Bintulu kala nyereta program ‘Ijtimak Tabligh’ di Masjid Sri Petaling, Kuala Lumpur kena 27 Februari nyentuk 1 Mac tu tadi.

Berebak enggau nya, Uggah madah, naka tu bisi 84 ari 90 sida ke bekaul udah dikelala lalu piak Sepital Bintulu udah meresa 23 iti darah nyengkaum ari pesakit.

Pemutus ba 22 titik darah nya, ku iya deka ditemu enda lama agi lalu iya minta sida ke bukai ari 90 iku nya datai beperesa darah.

Menteri Kaunsil Kandang Menua enggau Pengawa Berumah, Professor Dato Sri Dr Sim Kui Hian, Menijar Besai Kaunsil Pemansang Bintulu(BDA), Rodziah Morshidi enggau Residen Bintulu, Jack Aman Luat bela bisi nyereta pejalai nya.

Suara Sarawak