KENANG Iban enggau Rajah Brooke dikunsi siku graduet bidang Sains Sosial ari Universiti Malaysia Sabah (UMS), Nicholas J. Ugik mai kitai belematika pekara ti udah nyadi dalam jeman Sarawak dipegai Rajah Brooke nyentuk Kayau Lus.

Ku Nicholas, menua Sarawak dalam taun 1400 endang udah diperintah Sultan Brunei. Menua Brunei sebuah mengeri ti mansang ngemeranka pengawa dagang entara menua ari penuduk iya ti alai kapal sangkai ari menua luar kelebih agi pengudah perintah Sultan Melaka labuh dalam taun 1511 ketegal dialahka Portugis.

Ari nya tadi pengkalan dagang endur bukai pan lalu angkat ketegal bala pedagang ti enda setujuka chara perintah Portugis di Melaka. Portugis ngeletak pupu kelalu mar enggau dagang rempah dalam pelilih menua Nusantara semina ulih dipegai perintah Portugis aja.

Belabuh ari nya, Brunei lalu majak angkat nyadi siti kuasa dagang ti balat nyulut maya nya suba. Pemesai bungkur perintah Brunei ngerampit Pantai Barat menua Sabah enggau Sarawak (rampa menua Bau nyentuk Kuching) sereta genturung pendiau ba tebing tasik baka Kuala Batang Rajang, Kuala Saribas enggau Kuala Batang Lupar.

Sarawak diperintah Rajah Brooke

RAJAH KETERUBAH… James Brooke

Rajah James Brooke bepun nyadi Rajah menua Sarawak ari taun 1846 pengudah iya ngaga sempekat enggau Sultan Omar Ali Saifudin. Iya lalu nudukka Astana endur bejalaika perintah muakka kanan Batang Sarawak.

Sekumbang ke udah nyadi Rajah, iya majak ngerekai ke perintah iya besai sebesai lalu mayuh endur di menua Sarawak diambi iya ari pegai Sultan Brunei.

Perintah Rajah James Brooke ngerekai ari Batang Sadong nyentuk ka Tanjung Kidurong di Bintulu. Iya berengkah negapka atur perintah iya dibantu Kunsil Nengeri ke dipegai bala tuai raban bansa menua Sarawak.

Rajah lalu magi setiap sitak menua Sarawak nyadi bagi menua ti dipegai Tuan Residen.

Pengudah Rajah James Brooke ngasaika diri mansang tuai sereta ribat laban pemedis, iya nyiri ke anak menyadi iya empu benama Charles Johnson Brooke ti nyadi Rajah Muda nganti penuduk iya nyadi Rajah ba taun 1868.

NGERETAN JEMAN… Nicholas J. Ugik

James Brooke pulai ke menua England lalu parai sakit tuai lebuh umur manggai 65 taun.

Iban enggau Rajah Brooke

Dalam jerita lama, Rajah bansa ribai ari peturun Brooke ke megai menua Sarawak, cherita balat agi nyebut Rajah Charles Brooke ari maya perintah iya ti lama lebih kurang 50 taun enggau atur perintah ti dipeda ngemansangka Sarawak lebih nyulut agi.

Ari sistem perintah ke dikena Rajah Charles Brooke tu mih mayuh nyadi ke chuan perintah Menua Sarawak ke kemaya hari tu.

Opis perintah tauka kubu digaga ka endur Tuan Residen bejalai ke pengawa enggau endur bebayar ke pupu. Kubu tu sempama upis ke bekuta laban dipagar enggau tebelian sereta bisi bedil enggau dijaga soldadu.

Ba senentang ekonomi, iya mai bala penatai ari menua China ngemansang ke lumbung emas ba Bau enggau ngemeranka pengawa bekebun bedandang besai.

Ketegal ari chara perintah iya ti ngemeran ke pemaik entara raban bansa di Sarawak ti nagang pengawa ngayau enggau sistem pupu ti dipeda tuai raban bansa kelebih agi bansa Iban chara baru ti jauh bebida enggau jalai pengidup sida ke udah sejeman.

BUJANG BERANI… Rentap

Kenang kitai ngagai ketuai raban bansa kitai Dayak ke balat ngelaban perintah Rajah James Brooke maya iya nyadi Gabenor Menua Sarawak lalu dipadu ke Sultan Brunei nyadi Rajah.

Ari taun 1843 udah bisi kayau entara Dayak enggau Rajah. Maya nya, Bujang Berani ari Nanga Padeh, Pemancha Dana Bayang, betempuh enggau bala Rajah.

Kelimpah ari nya, Rajah nyerang Linggir Mali Lebu ba Kerangan Pinggai laban mai iya taluk ke perintah. Udah nya Rajah lalu mudik Batang Rimbas betempuh enggau Rekaya Antau Linggang Neneri enggau Rekaya Gun Mangku Bumi.

Semua tuai tu tadi alah magang lalu sida dibai Rajah James Brooke ngaga sempekat bebaik ngambi ke nadai penyarut agi. Semua sida nyerah tang enda setuju enggau perintah Rajah.

Bujang Timpang Berang

KENANG BESAI… Pengiran Muda Hashim minta bantu ari James Brooke ngasuh menua likun.

Dia mih kitai bisi meda tuai kitai Iban ke benama Libau Anak Ningkan tauka gelar iya Rentap Tanah, Runtuh Menua ari menua Skrang balat belaban enggau perintah Rajah ari iya ke enda talukka perintah.

Rentap tu pun iya enggau pengawa bekayau tu ari iya ke nyadi manuk sabung Orang Kaya Pemancha Dana Bayang ari Padeh. Pemancha Dana Bayang mayuh matak kayau besai nujah menua Batang Kapuas enggau menua pegai Sultan Sambas.

Nyadi sekali, Rentap ke nyadi manuk sabung ngulu ke kayau ngagai menua Sambas ba Pontianak ke kena taluk perintah Belanda. Dia deh Rentap tu besatup enggau anak menyadi Sultan Sambas lalu iya bulih dengah laban munuh anak menyadi Sultan Sambas.

Rentap mega ngerampas keris emas munsuh sereta bulih bedil Sultan Sambas ti digaga perintah Belanda ti digelar iya ‘Bujang Timpang Berang’.

Dalam taun 1844, bala Rajah ti betuai ke Capten Steward enggau Datu Patinggi Ali nyerang kuta Rentap ba Kerangan Peris tang sida alah jamah bala Rentap.

Udah nya Rentap bebalas enggau Rajah James Brooke ari ketegal Rajah nuduk ke Kubu James ba Nanga Skrang ba taun 1850. Rentap nyerang kubu tu laban iya meda chara Rajah tu nekat jalai sida mindah ke tasik enggau perintah ngumpul pupu ari bala Iban.

Ba perang tu, Komander Allan Lee nyadi dengah menantu Rentap ke benama Layang. Laya Rentap enggau Rajah Brooke nyerarai nyentuk kuta Rentap ba Bukit Sadok dialahka bala Rajah dalam kandang taun 1861.

Ketebal agi kayau ke dibatak Rajah Brooke tu diulu ke Rajah Muda Charles Johnson Brooke kelebih agi penyarut entara perintah enggau Rentap.

Charles Brooke ke agi mangku pengawa Rajah Muda belajar ari peneleba iya ngulu ke kayau belaban enggau tuai raban bansa ke enda taluk ke perintah.

Iya mega bisi peneleba dalam ngatur diplomasi tauka aum ngemadu ke penyarut baka aum Rajah enggau Rentap dalam taun 1853 laban ka bebaik.

Betampung ba tusun kedua.