KUCHING: Bantu belanja ninting bulan RM250 pengelama enam bulan dalam pakej Bantu Khas Sarawakku Sayang (BKSS) deka diberi enggau chara ti efiesen sereta teratur.

Nitihka penerang ari Sekretari Perintah Nengeri, sida ke ngembuan akaun bank udah direjister, bantu nya deka dipasuk terus ngagai akaun bank penerima ninting 15 haribulan sekumbang timpuh enam bulan tu berengkah bulan April ngagai September 2020.

Taja pia, bisi 23,000 orang ke nerima bantu tu nadai akaun bank.

“Nya alai, bantu nya deka diberi nengah Pampang Opis Pekara Wang Nengeri semak enggau genturung pendiau diri empu ngena dua renggat.

“Renggat keterubah deka nerima bantu kenaka 15-30 April 2020 lalu renggat kedua deka nerima bantu berengkah 15-30 Ogos 2020,” ku penerang nya, kemari.

Rintai nama orang ke patut nerima bantu tu iya nya orang ke nerima Bantu Sara Hidup (BSH) kena bulan Januari 2020 ke udah dikemendarka Lembaga Hasil Dalam Negeri Malaysia (LHDNM).

Nya alai BKSS tu enda ibuh dipinta manual laban automatik bisi ngagai sida ke patut nerima.

Bisi 430,000 rayat Sarawak kategori B40 deka nerima bantu belanja ninting bulan penyampau RM250 pengelama enam bulan berengkah bulan April ngagai September 2020.

Bantu belanja nya diberi ngambika ulih ngelempungka penusah ke ditapi rayat nengeri tu kelebih agi kategori B40 ti kena empas ari pengerekai igi penyakit Covid-19.

Berebak enggau nya, Perintah Sarawak ngelalau mensia mayuh ba nengeri tu ngambika nguna aplikasyen SarawakPay ba pengawa bebelika barang kelebih agi rambau pengerekai igi penyakit Covid-19.