DEBAK: Adun Saribas Mohd Razi Sitam ngelalau peranak ditu seruran nitihka Atur Tagang Pejalai (PKP) dipejalai diatu.

Iya mega minta mensia mayuh meretika atur pengelikun bekaul pengerai diri baka udah dipadah Opis Menteri Pengerai Menua (KKM) dikena nagang pengerekai igi penyakit Covid-19 ba sitak nya.

Nya kebuah Razi ngandalka sukung ari bala ketuai raban bansa, tuai rumah nyengkaum ketuai ruang bilik nentuka PKP ulih nyapai tuju dikena mutuska rantai igi penyakit berampit tu.

“Mensia mayuh kelebih agi raban nembiak ke diau semak pasar dipinta meretika jaku tangkan enggau enda ngelanggar atur lebuh raban gawa ba luan baka piak neritka atur bejalaika pengawa.

“Pemujur semua pengawa enggau atur nyengkaum ngemunaska igi penyakit tu bepanggai ba kitai empu.

“Nya alai, aku minta rayat bela meri kerejasama enggau sukung ngagai piak bekuasa nentuka igi penyakit tu jampat pukas,” tandu iya.