KUCHING: Atur Tagang Pejalai (PKP) di Sarawak lebih agi di menua pesisir bisi ditendur taja pia sida ke mindah jauh patut minta pemendar ari Balai Polis ke besemak, ku Datuk Amar Douglas Uggah Embas.

Sapit Kepala Menteri ti mega nyadi chairman Komiti Penyangga Penusah Ngenyit Nengeri (JPBN) nya madah peranak rumah panjai ke diau ba menua pesisir dikemendar pansut ari genturung pendiau ngelui ari 10 kilometer (KM) kelebih agi sida ti deka berubat ngagai klinik tauka sepital.

JPBN udah berandau enggau piak polis ngambika pekara nya dikemendarka ungkup peranak rumah panjai ke deka nganjung diri berubat tang jauh ari sepital, klinik tauka farmasi.

“Tu atur ungkup rayat menua pesisir laban bisi sekeda rumah panjai jauh ari sepital enggau klinik, nya kebuah sida dikemenar pansut lebih ari 10 KM bebida enggau rayat di mengeri.”

“Bisi sekeda genturung pendiau ba menua pesisir penyauh 20-30KM ari pasar semina deka ngulihka servis berubat tauka servis bukai ke diguna ,” ku iya.

Uggah madah munyi nya ba aum pemberita pasal Covid-19 di Wisma Bapa Malaysia ditu, kemari.

Nangkan nya ku iya, bantu pemakai ba menua pesisir deka dipejalaika nengah komiti khas ti betuaika Sapit Kepala Menteri Datuk Amar Awang Tengah Ali Hasan lalu sida deka ngatur enggau manah chara dikena meri bantu nya.

“Komiti khas tu bisi chara ti engkeman ungkup semua rayat menua pesisir ngambika bantu nya datai ba sida.

“Ngagai barang sapa ti begunaka pejalai jauh ketegal deka meli pemakai tauka ngambi duit, piak polis mega deka ngemendarka pekara nya,” ku iya.

Taja pia, peranak rumah panjai ke deka ngambi duit ke pasar patut minta bantu ari siku peranak rumah panjai nya ke bisi nurun ngambika enda mayuh orang nurun ke pasar.

Kelimoah ari nya, berengkah 3 April tu, pejalai ari siti pelilih menua ngagai pelilih menua bukai meseti minta pemendar ari Balai Polis Pelilih ke semak enggau endur diau diri empu.

Ku Uggah, pemendar ke udah dikemendarka ari Opis Pelilih sebedau tu iya nya sebedau 2 April meseti disahka baru ba Balai Polis besemak enggau endur diau.

Ngelansa bekaul enggau Bantu Khas Sarawakku Sayang (BKSS), Uggah madahka Perintah Sarawak deka beratika chara ti engkeman dikena mantu sida ke diau ba menua pesisir kelebih agi ke diau jauh ari pasar nerima duit bantu nya.