BALINGIAN: Kaban Kunsil Nengeri (Adun) N58 Balingian, Abdul Yakub Arbi ngelalau mensia mayuh kelebih agi peranak ba sitak N58 Balingian anang mudah pechaya ngagai pekara bekaul enggau ngajum.

Iya mega madah, anang kelalu mendingka jaku dikerembai sebelah media rama baka Facebook laban engka jaku nya semina jaku ajum enggau berita ke ditempa sengapa.

Abdul Yakub meri terima kasih ngagai Perintah Sarawak laban udah meri bantu pemakai sekumbang PKP ketegal pengerekai igi penyakit Covid-19 tu.

Perintah Sarawak udah ngaga pemutus pemadu manah laban beratka pengelantang rayat Sarawak lebuh nagang igi penyakit tu ari majak ngerekai.

Nambahka nya ku Yakub, pemutus tu endang manah amat ngambi nyaga pengelantang rayat.

Nya kebuah, rayat patut beterima kasih taja bantu pemakai, berau enggau ke bukai nya enda mayuh tang, bantu tu ulih ngelempungka tating belanja ketuai bilik.

Terang Yakub, arap besabar ngagai sida ke bedau nerima bantu laban kelalu mayuh peminta dianjung diatu iya nya semua palan servis ba Sarawak ngudar berau, lalu bisi sekeda endur enggau nganti lama datai ba endur kita.

Nya alai, iya ngarapka rayat semampai nitihka atur PKP, diau jenuh ba rumah, putuska rantai Covid-19, jaga pengelikun diri, ngena awak tu begulai enggau diri sebilik lalu ngereja pengawa ke patut lebuh diau ba rumah.