SIKU penanyi Iban ke ngembuan patah nyawa ke chukup manah sereta udah suah nerima bemacham anugerah, Eqka Saiful chukup kemerah dirandau pemberita nyerumba kemisi Atur Tagang Pejalai (PKP) jam ke diatu.

Taja baru ba dunya pemerindang, tang nama iya majak pegari ba industri muzik Dayak laban ngembuan vokal pemadu manah sereta lagu iya mega ngembuan besai reti kelimpah engkeman enggau genre muzik dikerindu mensia mayuh jeman diatu.

Eqka ti baru beumur 21 taun udah menggi mayuh anugerah kelimpah nama iya majak dikelala sebaka enggau penanyi bukai ke lama udah angkat ba dunya pemerindang ditu.

Nama Eqka majak dikelala pengudah ngeluarka single keterubah iya nya Padamka Nama Aku ditengkebang Chie Johnny kelimpah lagu iya tu suah dimain ba radio.

Lagu Padamka Nama Aku tu udah ngangkatka nama Eqka kelimpah tiun tu engkeman amat mantaika pengasai ati balat asa laban udah dikeduan.

MERINDANG… Eqka benung merindang bala peminat beserimbai enggau Program Lan Berambeh Anak Sarawak 2017 ba PWTC, Kuala Lumpur.

Bepun ari nya, iya suah diundang belagu lebuh bisi panggau pemerindang ba sebarang pengerami di menua tu.

Eqka mega madahka iya rindu belagu kenyau ari mit sereta enda muai peluang mantaika pengelandik belagu lebuh iya suah nyereta pekit belagu di menua tu.

Pia mega, iya madahka diri rinduka semua genre muzik kelebih agi genre dangdut enggau balada.

Taja bansa Melayu, tang Eqka landik amat mai lagu Iban enggau lagu Bidayuh ngujungka iya majak dikerindu taja ukai bansa Iban.

PUN PEMUJUR

KENANG DUDI HARI… Eqka begambar kenang enggau penengkebang lagu Padamka Nama Aku ba ACSJ Ke-4 2017.

Berindik ari pengelebih landik belagu, dia iya suah nerima mayuh anugerah ba dunya pemerindang tu baka bulih lumur tiga ba Anugerah Charta Sapa Juara (ACSJ) Ke-4 diatur RTM Sarawak enggau WaiFM Iban, Artis Finalist ACSJ Pemadu Tebilang Majalah Senawah 2017, bulih lumur dua enggau vokal pemadu manah ba ACSJ Ke-6 2019 lebuh nyadaka lagu Empeleman.

Nangkan nya, Eqka mega kala menggi gelar champion Mega Star Voice Challenge Kaban Music Production 2019, Anugerah Popular KMP 2019, Penanyi Indu Tebilang, Album Solo Tebilang (Empeleman), Lagu Balada Tebilang Kategori Indu (Empeleman), Lagu Bidayuh Tebilang (Pingabis Rindu) enggau Lagu Ranchak Tebilang Kategori Indu (Chelum Manis Burak Lis).

Eqka mega suah dikangau merindang ba selampur menua tu lalu mayuh peminat ti semampai nyukung pejalai iya ba dunya pemerindang tu.

“Terima kasih ngagai semua peminat, diri sebilik enggau bala bakih ke seruran nyukung aku ari keterubah ngeluarka single nyentuk diatu.

“Sukung kita udah mai aku mujur dataika diatu enggau bala penengkebang sereta semua tu udah bejalaika pengawa ngemujurka single keterubah aku nyentuk single keempat tu.

“Pia mega, meri besai terima kasih ngagai kami sebilik enggau bala penengkebang sereta produser ba Kaban Music Production laban udah nengkebang sereta ngeluarka single aku,” ku Eqka nerang.

Ku Eqka, iya gaga amat nerima jaku peransang ari diri sebilik ngambi ransing agi merindang kelimpah sukung bala krew ti udah ngemujurka pejalai iya lebuh ngeluarka empat single nya .

VOKAL PEMADU MANAH… Eqka menggi Anugerah Vokal Pemadu Manah enggau bulih lumur du aba ACSJ Ke-6 2019 nyadaka lagu Empeleman.

PEJALAI BA DUNYA PEMERINDANG

Mulaika pengingat suba, Eqka madahka iya ngepunka pengawa belagu ari busking begulai enggau Ikon Buskers enggau suah nyereta pekit karaoke ba mayuh palan pemerindang di menua tu.

“Jesley Jabu udah mai aku nyadi recording artist laban iya suah nyadi akim ba pekit karaoke ke suah disereta aku.

“Iya enggau menyadi iya, Matthius Mambang nya penengkebang lagu aku enggau produser maya nya, Chie Johnny di baruh Lebal Kaban Music Production.

Diatu, Eqka udah bisi empat single iya nya Padamka Nama Aku, Empeleman, Terempas (deka dikeluar enda lama agi) enggau Satu Memori Abadi sereta Selimpir Pengerindu Dibelah Dua.

Dunya pemerindang Iban kemaya hari majak tebilang enggau majak diterima ba selampur menua laban udah nitihka biuh ke dikedeka bala peminat.

Nitihka singkang pemansang dunya, mayuh penanyi tauka pengeluar lagu ngena pelasar media rama ngelakuka lagu sida nengah Yotube tauka pelasar media rama bukai.

Chara tu engkeman amat setipak enggau ubah pemansang bekenaka teknologi moden ngambika lagu nya nyamai digiga enggau didinga mensia mayuh kelimpah ari meli CD original.

Berebak enggau nya, Eqka udah ngelancharka single Satu Memori Abadi enggau Selimpir Pengerindu Dibelah Dua ba Eqka Saiful Channel kelimpah bala peminat ulih mendingka lagu tu ba radio.

KELAI PEMUJUR… Eqka begambar kenang enggau bala penengkebang lagu lebuh menggi Anugerah Pemadu Tebilang Kaban Music Production 2019.

CHERITA DALAM LAGU

Ba lagu Melayu pemadu baru ari Eqka, iya madahka lagu nya lain ari lagu bukai laban deka nyadi lagu ba sebengkah dokumentari Tragedi Pulau Kidjang ti karam ba taun 1973.

Dokumentari ngena lagu Satu Memori Abadi nya ngangkatka baru jerita sentang Pulau Kidjang ti nabanka mayuh nyawa sereta cherita ke semampai dikenang mensia mayuh kelebih agi ruang bilik ke dituntung penusah karam tu.

Ku Eqka, leka lagu tu ditengkebang Matthius Mambang enggau Jesley Jabu lalu muzik tu digaga Hairee Francis lalu dikeluarka Allen Tinggi Sdn. Bhd.

Album ketiga iya nya lagu terempas, produser Amberlly Vichie ti deka dikeluar enda lama agi ungkup bala peminat.

Lebuh ngelansa lagu Empeleman tu, leka lagu nya nusui sentang pengerindu enda dikenang tauka diteju pia aja ngujungka pengerindu nyau tekesai laban enda ngamatka semaya diri.

Tebal agi, single Eqka tu ngenang pasal pengerindu nitihka tiun ke manah didinga ungkup bala peminat.

“Ngenang pasal lagu Selimpir Pengerindu Dibelah Dua, leka lagu tu nusui pasal siku indu enggau bekunsi pengerindu ketegal pangan iya majak ingat tauka ngenang indu ke kala madu pengerindu enggau iya suba.

“Semua lagu nya endang ngenang pasal pengerindu ngambi kitai anang beduan tauka ngayahka orang bukai.

PEMAR BA INDUSTRI MUZIK

Ba dunya pemerindang kemaya hari, mayuh pemar ditapi bala penanyi ngambi ulih angkat sereta tebilang baka orang bukai.

Nambahka nya, bala penanyi enggau naka ulih ngemajuka diri sebaka enggau penanyi ti mayuh peneleba sereta pengelandik ba dunya pemerindang tu.

“Industri muzik ditu majak mansang lalu bala artis ke baru enggau naka ulih ngangkatka nama sida sebaka enggau artis bukai ti ngembuan mayuh peneleba.

“Industri tu mega majak mansang enggau nempa mayuh artis baru ti bepenau nengah pelasar Youtube Channel, radio sereta pelasar media bukai baka surat kabar, Facebook enggau Instagram.

Eqka ngarapka penyalah chelak tiru ulih ditagang ngambi enda ngeruga kualiti industri muzik kemaya hari lalu bala peminat patut meli CD Original laban bekualiti taja mar rega.

“Semua kitai patut nagang chelak tiru ba menua tu kelai nyukung industri muzik Dayak sereta ngangkatka dunya pemerindang kitai sebaka enggau orang bukai.

Nya alai, Eqka ngarapka iya ulih mansang jauh agi ba dunya pemerindang tu ngambi ulih merindang semua bala peminat ke udah nyukung iya ngelama tu.

Iya mega ngarapka industri muzik Dayak majak tebilang sereta dikelala ba serata dunya laban tiun muzik kitai diatu udah nitihka singkang gaya muzik pemadu baru.