KUCHING: Sekumbang Atur Tagang Pejalai (PKP) diteritka ba menua tu, mayuh macham chara dikena mensia mayuh ngisi kemisi diberi perintah begulai enggau diri sebilik.

Mayuh dipeda ba media rama ke alai orang mantaika pengelandik diri ngaga mayuh macham pemakai baka roti canai, ai kopi viral, lalu bisi sekeda ngaga kuih tradisional baka penyaram.

Kelimpah ari nya, bisi mega keterubah ngaga penyaram lalu asil penyaram ngasuh geli ati sereta jelungan enda baka ke suah digaga bala ini ba rumah panjai.

Sangin Juat ari Nanga Selaut Tengah, Julau madahka diri kala ngaga penyaram sebedau tu laban suah meda sida ini begaga ka penyaram lebuh bisi pengerami baka Hari Gawai tauka orang nikah.

Ukai nya aja ku iya, kekadang ini iya mega kala bejualka penyaram ba rumah panjai.

Sangin Juat

“Keterubah ngaga kediri aku endang bisi berasai geli ati laban gamal penyaram enda chukup bajik nunda enggi orang.

“Tu kelebih agi enti bisi penimpang lebuh ngelumai penyaram nya,” ku iya nusi peneleba diri.

Ku Sangin, suba endang manah gamal penyaram digaga iya laban ke dilumai sida ini.

Tang enti enda chukup peneleba sigi puh ka jelungan.

“Taja pia nya bepanggai ba siku-siku orang. Ambika banding, bisi orang ngelumai penyaram nya lalu tanak, sereta manah dipeda.

Titie Ayong

“Bisi orang enggai enda diperam semalam baru gamal penyaram ka manah dipeda,” ku iya.

Lebuh dirandau Suara Sarawak kebuah rindu ngaga penyaram, Sangin madahka penyuah iya lelak meda penyaram digaga mensia mayuh mansa ruai facebook.

“Penyuah meda, nyau nemu tetenguk, tambah mega sigi rindu makai penyaram laban tu siti ari kuih asal ke dikerindu.

“Pia mega, nyau ambis utai udah diuji ke nguan hari seraya ke taluk ke pesan perintah besai ti ngasuh kitai diau di rumah.m sekumbang PKP,” ku iya.

Nangkan nya, Titie Ayong ari Sri Aman madahka iya enda kala ngaga penyaram sebedau tu.

Dorothy Landan Sanjan

“Pekara ti ngasuh aku geli ati lebuh keterubah ngaga penyaram iya nya penyaram nadai bebungai ba tisi.

“Tang pemuas ke meda bala kaban ba facebook mantaika diri ngaga penyaram, aku lalu tekuing ati ka ngaga,” ku iya.

Ku Titie, pengawa ngaga penyaram tu semina dikena iya muai awak puang diau di rumah sekumbang PKP diteritka ba menua tu.

Ba Dorothy Landan Sanjan ari Ulu Kakus Tatau ti mega keterubah iya ngaga penyaram, iya madahka diri chukup bidik laban penyaram digaga iya manah gamal taja baru iya enggau orang ngeruh ai ngaga kuih tradisional nya.

“Aku endang enda kala enggau orang ngaga kuih tu, tu kih keterubah aku ngaga penyaram,” ku iya.

Ku Dorothy, mayuh macham runding nyadi lebuh ngaga penyaram tu laban irauka penyaram enda nyadi baka kedeka ati.

“Tang seninjik endar keterubah ngaga penyaram nya alu nyadi pengudah dipanduk,” ku iya.

Dorothy mega madahka sekumbang PKP tu patut nyadi peluang mensia mayuh belajar ngaga kuih tradisi Iban.

Kebuah pia ngambika pengawa asal aki ini kitai enda lenyau ngapa sereta seruran dikemeranka nembiak baru.